Real Madrid është konfirmuar edhe njëherë si superfuqia e futbollit. Mbretërit kanë triumfuar për herë të tretë në Botërorin e Klubeve, ashtu si edhe në Champions League, pasi kanë mposhtur Al Ain me rezultatin e thellë 4-1.
Ishte Luka Modric ai që kaloi Los Blancos në avantazh në minutën e 14’. Pasi merr një top nga Benzema, Topi i Artë ka gjetur rrjetën me një goditje të bukur nga distanca. Ky ishte goli i parë i kroatit në një finale me Real Madrid.
Pas pushimit ishte talenti Marcos Lllorente që dyfishoi rezultatin në minutën e 60’. Spanjolli ka lëshuar një predhë nga distanca duke mposhtur për të dytën herë portierin Eisa. Ndeshja mund të quhej e mbyllur në atë moment, megjithëse Real vazhdoi të insistonte për të shënuar më shumë gola.
Në minutën e 79’ erdhi goli i tretë me Sergio Ramos që shënon pas një goditjeje me kokë nga brenda zonës. Në minutën e 86’ Al Ain shënoi golin e nderit me anë të Tsukasa Shiotani, i cili ka bërë një gol shumë të bukur me kokë. Në fund të takimit, ishte edhe Vinicius Junior që detyroi mbrojtësin Nader të shënonte një autogol. Një sfidë e lehtë për Los Blancos.
Sulmuesi i Real Madrid Gareth Bale ka fituar Topin e Artë të Botërorit për Klube. Në përfundim të finales së madhe mes Real Madrid dhe Al Ain, janë ndarë çmimet personale përpara se trofeu i Kupës së Botës për Klube t’u kalonte lojtarëve të Madrid.
Megjithëse nuk arriti të shënonte asnjë nga katër golat e Real në finale, uellsiani ka merituar çmimin personal që ndahet çdo vit. Ai ka shënuar tre gola në gjysmëfinale ndaj Kashima-s dhe ka qenë një nga lojtarët që u ka shkaktuar më tepër probleme kundërshtarëve edhe në finale.
