Real Madrid përfundimisht është në krizë të thellë. Këtë krizë e ka vërtetuar edhe humbja në “Santiago Bernabeu’ nga Villarreali, me një gol të shënuar në minutat e fundit të takimit. “Nëndetësja e verdhë’ tani është vetëm një pikë larg ekipit të Zidane që mban vendin e katërt me 32 pikë të grumbulluara pas 18 javësh të La Liga-s.
Ndeshja filloi në ritme të larta dhe madrilenët ishin dukshëm më lart, pasi zhbllokuan sfidën në minutën e 14’ me Gareth Bale, por që anulohet për pozicion jashtë loje. Më pas është Marcelo që rrëzikon, por portieri Asenjo bën mrekullinë. Radha ishte e Cristiano ronaldo që të provonte, por nga goduitje dënimi ai ndalet nga traversa. Në të 29’ minutë zgjohet edhe Villarreai, ku Carlos Baca shpërdoron një rast të pastër shënimi.
“Los Blancos” dominojnë të gjithë pjesën e parë dhe Ronaldo ndalet për herë të dytë nga traversa dhe shpërdoron shumë në fundin e saj, për ta mbyllur me porta të paprekura të parë. E dyta nuk ndryshon histori, është sërish ekipi i Zidane që dominon takimin dhe krijon raste pa fund, por fati dhe dita e mirë e Asenjo ka bërë që të mos shkojë topi në rrjetë.
Dominimi i “Los Blancos” ka vazhduar deri në minutat e fundit të ndeshjes, por kanë qenë miqtë ata që kanë gjetur golin e fitores në minutën e 88-të me Fornals, i cili ka mposhtur Navas me një goditje të bukur me hark. Zidane ka thënë para kësaj ndeshje se është lodhur duke dëgjuar të flitet për një Real në krizë, por pas këtij takimi do të jetë e vështirë që francezi ta mohojë atë që po ndodh brenda ekipit të tij.
