Vesel Veseli është polici nga Kosova, i urryer në masë tashmë nga qytetarët pas dyshimeve për përdhunimin e vazhdueshëm më shumë se një vit të një 16 vjeçareje. Kjo e fundit kishte kërkuar ndihmë në polici pas ngacmimeve nga një prej profesorëve të saj.
Polici ka shfrytëzuar pozitën e tij, duke abuzuar seksualisht me vajzën, e cila ka mbetur shtatzënë me të e më pas ai e ka detyruar të abortojë.
Rasti i 50-vjeçarit ka tronditur më së shumti katër fëmijët e tij, të cilët janë shokuar nga rasti për të cilin akuzohet i ati.
E pyetur nga mediat për rastin, vajza e tronditur e nën lot nuk ka pranuar të flasë asnjë fjalë, ndërsa shoku i Policit të dyshuar ka thënë se rasti është i montuar dhe e vërteta do të dalë së shpejti në shesh.
