Laçi-FLAMURTARI 1-1
Trajneri i Laçit, Gentian Mezani e konsideroi të drejtë rezultatin e sfidës me Flamurtarin, ku iu desh të ndalte ish skuadrën e tij.
“Emocionet ishin të mëdha, por më duhet të mendoj si profesionist për rezultatin më pozitiv të mundshëm. Rezultati 1-1 besoj se është ai i drejti.
Edhe kundër Skënderbeut zhvilluam lojë të mire, ndërsa sot morëm një pikë, tani shpresoj që të përmirësohemi edhe më shumë në ndeshjet e ardhshme.”
Mjaft i ashpër me gjykimin u shpreh pas barazimit 1-1 me Laçin Shpëtim Duro. Trajneri i Flamurtarit kujtoi se përveçse nuk iu akorduan 2 11-metërsha, skuadra e tij u ndëshkua edhe me një penallti të paqenë.
Nuk ka nevojë për koment, jemi ndëshkuar me 11-metërsha edhe në ndeshjet e para, ndërsa Flamurtarit nuk i jepen penalltitë. Për dy penalltitë e padhëna sot as që e vë në diskutim që ishin. Ka ndikim në rezultat gjyqtari i ndeshjes, ashtu si në ndeshjet e mëparshme. Megjithëse kishim kundër gjyqtarët, ne duhet të fitonim. Unë e përgatis skuadrën që arbitrin e kemi kundër. Duhet t’i kishim shfrytëzuar rastet e krijuara me Bushiç dhe Danilo Alvesh. Më vjen keq që nuk arritëm të fitonim.
Kukësi-Teuta 4-2
Mladen Milinkovic i tërheq vëmendjen skuadrës së Kukësit për ato minuta aspak të mira në fundit e takimit, që rrezikuan madje edhe fitoren me Teutën. Sipas tij, është e papranueshme që futbollistët të lëshojnë terren kur ka shumë minuta për t’u luajtur.
“Jam shumë i kënaqur me rezultatin dhe fitoren, por jam shumë i mërzitur me 15 minutat e fundit. Kur je në avantazh 3-0, duhet të jesh i qetë dhe të mos pësosh gol.
Alyev u fut në pjesën e dytë dhe shënoi dy gola. Unë jam shumë i kënaqur, sepse vetëm unë e di sa shumë probleme kishim më dëmtimet. Lojtarët, që u jepet mundësia për të luajtur, duhet të japin maksimumin përgjatë gjithë lojës.”
I pakënaqur me atë që skuadra shfaqi në pjesën e parë dhe i vetëdijshëm që për të dalë nga kjo krizë rezultatesh Teutës i duhet shumë punë. Gugash Magani theksoi se humbja me Partizanin është përjetuar shumë keq në kampin durrsak.
“Mendoj që skuadra pati dy tablo. Në pjesën e parë nuk ishte Teuta që unë dua, ndërsa në fraksionin e dytë edhe mund të kishim barazuar.
Është përjetuar shumë keq humbja me Partizanin. Janë dy humbje që peshojnë, na duhet shumë punë për ta motivuar skuadrën.
Sot e merituam humbjen, sepse Kukësi qëndroi thuajse gjatë gjithë kohës në avantazh. Nuk ishim aty ku duhet, sidomos në fillim të ndeshjes.”
Kamza-Vllaznia 1-0
Trajneri i Kamzës Ramadan Ndreu, u gëzohet tri pikëve ndaj një emri të madh të futbollit shqiptar, siç është Vllaznia. Shpirti i garës, sidomos në momentet e fundit, është ajo që e dallon skuadrën debutuese në Superiore.
“E merituam fitoren, pavarësisht mungesave. Në 5 takime në pjesën e parë nuk kemi shënuar e ndoshta lojtarët kanë frikë të përballen me ekipet e Superiores. Reparti i mbrojtjes, duke përjashtuar 10 minutat e para, e bëri shumë mirë detyrën. Jemi me këmbë në tokë. Kam besim te kjo skuadër, kemi marrë lojtarë me shpirt gare. Sidomos në 20 minutat e fundit nuk pajtohen me rezultatin dhe kërkojnë maksimumin.”
Trajneri i Vllaznisë, Armando Cungu, nuk i kurseu kritikat për skuadrën e tij, që nuk po jep maksimumin për të marrë rezultat pozitiv.
Nuk është situatë e mirë, pasi vetë rezultatet nuk të lënë shumë për të komentuar. Kemi bërë gabime të shumta, sidomos në shtëpinë tonë. Çdo ekip në fushën e vet bën maksimumin. Duket se e kemi marrë pak lehtë. Nuk vijnë pikët nëse nuk djersin shumë. Patëm 45 minuta të mira, me dy raste për të shënuar, ndërsa në 45 minutat e dyta nuk bëmë asgjë. Nuk mund të rrijë një ekip për një pjesë lojë në gjysmëfushën e tij. Kemi prodhuar lojë, kemi patur mundësi për shënim, por shpërdorojmë shumë.
Cungu e pranoi se organika e Vllaznisë ka mungesa të lojtarëve cilësorë për ta dërguar topin në rrjetë.
Nuk e di kur do të marrin përgjegjësi lojtarët për ta çuar topin në rrjetë. Unë marr përgjegjësitë e mia, por kjo është Vllaznia, me këta lojtarë. Gjithsesi, unë besoj se nuk është ky maksimumi që mund të japë Vllaznia, pres shumë më tepër.
