Lideri i partisë “Demokracia e Re” dhe opozitës greke, Kyriakos Mitsotakis ka folur për rastin e Konstandinos Kaçifas. Ngjarjen në Bularat ai e ka etiketuar si një “vrasje”, por ka bërë thirrje që të shmangen deklarata dhe veprime që vendosin në rrezik marrëdhëniet dypalëshe.
Reagimi i Mitsotakis u bë gjatë një interviste për gazetën serbe “Politica”, duke komentuar edhe raportin mes Greqisë dhe Shqipërisë.
Kujtojmë se menjëherë pas ngjarjes kryeministri Edi Rama e konsideroi viktimën një ekstremist të çekuilibruar dhe mbrojti idenë se vrasja e tij ishte e pashmangshme.
“Të shtënat dhe vrasja e një anëtari të pakicës greke në Shqipëri lë shumë boshllëqe dhe rrethana të paqarta të cilat autoritetet shqiptare duhet t’i shpjegojnë. Disa deklarata nga ana e tyre nuk janë të dobishme dhe ne të gjithë duhet të jemi të kujdesshëm. Marrëdhëniet mes dy vendeve duhet të ruhen dhe të mos përkeqësohen nga deklarata dhe veprime të tilla”, tha Mitsotakis.
