Një zyrtar i lartë turk, këshilltari presidencial Yasin Aktay, ka thënë se ai beson se trupi i Jamal Khashoggi u shpërbë në acid pasi u pre në copa nga vrasësit.
Sipas tij “përfundimi i vetëm logjik është se ata që kanë vrarë gazetarin saudit në Stamboll, kanë shkatërruar trupin që të mos lënë asnjë gjurmë prapa”.
Khashoggi, kritik i sundimtarëve sauditë është vrarë në konsullatën e vendit më 2 tetor. Por, deri më tani nuk është gjetur asnjë provë se trupi i tij mund të jetë shpërbërë.
Këto akuza, Aktay i bëri në një intervistë për gazetën Hurriyet Daily, ku tha se ky veprim është marrë për të zhdukur dhe tretur trupin më shpejt.
Këto pretendime erdhën pasi e fejuara e Khashoggit, Hatice Cengiz, u bëri thirrje autoriteteve botërore që të vinin autorët para përgjegjësive.
Arabia Saudite ka mohuar akuzat se vrasja është bërë me urdhër të familjes mbretërore, ndërsa princi u zotua se është i vendosur për zbardhjen e vrasjes.
Prokurori i Stambollit konfirmoi të mërkurën se shkrimtari ishte mbytur.
