Ftesa për të qenë pjesë e kombëtares A, për mesfushorin Ylber Ramadani ka qenë një surprizë për lojtarin. Ish-lojtari i partizanit shprehet mjaft i gëzuar nga kjo ftesë dhe premton se do të japë maksimumin për të arritur sa më lart me kombëtaren. Po ashtu beson se forma e tij e mirë që është duke kaluar ka bindur Panuccin që ta thërrasë në përballjen me Turqinë.
“Ishte një gëzim shumë i madh për mua, sepse e kam menduar që fëmijë. Jam shumë i lumtur që ëndrra ime u bë realitet. Mendoj se konkurrenca është e vështirë, por unë gjithmonë do të mundohem të bëj punën time më së miri. Me punë dhe sakrificë do ia dal. Në skuadër ka shumë lojtarë cilësorë, por unë do vazhdoj hap pas hapi, pse jo të luaj një ditë nga minuta e parë.
Te Partizani kam qenë në formën time më të mirë, por edhe këtu në Danimarkë kam luajtur disa ndeshje të mira. Mendoj se kjo është edhe arsyeja e ftesës. Kam punuar shumë për të arritur këtë moment”, u shpreh Ramadani për Supersport.
