Kreu i PD, Lulzim Basha, nën thirrjet “Rama ik”, në protestën e 7 kombëtare të opozitës tha se banda kriminale s’mund të jetë qeveria jonë. Me tone të larta, kryedemokrati u shpreh se kryeministri Rama sot duhet të ishte para drejtësisë, pasi ka vjedhur votat e shqiptarëve.
Duke shprehur mirënjohje për qëndresën e qytetarëve, e duke numëruar arsyet pse po protestohet, Basha u ndal edhe tek arsimi i lartë. Sipas tij, arsimi është në krizë totale, ndaj të rinjtë kanë mbushur sheshin plot. Sipas tij, tarifat e larta janë falë Ramës, e ndërsa detyroi studentët të braktisin universitetin.
“Kufoma politike e njeriut më të urryer që nga diktatura, njeriu që u kap duke vjedhur votën e shqiptarëve me banditët më famëkeq të Shqipërisë dhe Europës, sot duhet të jepte llogari për hajdutërinë e gjithë hajdutërive, vjedhjen e pushtetit. Rama ik”.
Basha foli edhe për atë që e cilëson si mashtrimin me vendet e punës. Ai foli në emër të çdo qytetari të papunë.
“Ky bashkim popullor është bashkimi i shqiptarëve të vjedhur, të shtypur, të dhunuar, të nëpërkëmbur, të mashtruar, të tradhëtuar nga një bandë kriminale që kurrsesi nuk mund të jetë qeveria e Shqipërisë.
Le ta dëgjojë nga bunkeri ku është fshehur, zërin tuaj. Bëjeni ta dëgjojë e gjithë bota. Sot endet nëpër Shqipëri kufoma politike e njeriut më të urryer që nga diktatura.
Edi Rama është njeriu që u kap duke vjedhur votat e shqiptarëve. Sot ai duhet të ishte para drejtësisë, duhej të jepte llogari për vjedhjet. Ky komb është bashkuar në histori rreth kauzave të mëdha, dhe me bashkimin e tij ka bërë të mundur mposhtjen e së keqes. Kështu e hodhëm diktarurën.
Kurrë më parë kërcënimi për të ardhmen tonë nuk ka qenë mbledhur në një grusht kaq të vogël banditësh me në krye Edi Ramën. Prandaj kjo kauzë do zgjidhet siç i ka zgjidhur Shqipëria e shqiptarëve të bashkuar, me vlera, me bashkim, me kurajo. Ora e tiranisë po numëron mbrapsht.
Askush nuk e ndal dot fuqinë e një kombi të bashkuar për liri, për demokraci. Rama ik! Sot Edi Rama ka një propozim për ju, ju vodhi votat në 2017 me kriminelët dhe asnjëri nuk mbajti përgjegjësi, vodhi 40 milionë Euro tek Unaza e Re, banorët në burg, theu këmbët e nënave që mbronin shtëpitë e tyre, asnjë politikan i korruptuar para drejtësisë, dhe tani kur ne i themi nuk e pranojmë më hajdutërinë, përgjigjja e tij është ‘do ju vjedh 10 herë më shumë’.
300 milionë tek Milot-Balldre, kjo është përgjigjja e hajdutit. Ne do ta mundim krimin, ne do ta shporrim qeverinë e krimit. E gjithë beteja jonë bëhet për zgjedhje të lira e të ndershme. Rrugën tonë të Europës do ta hapim. Vëllezër dhe motra, mos lëndoni oficerët e policisë, mos prekni asnjë oficer policie, sepse hiq 2-3 servilë të inkriminuar, mendjet e tyre mendojnë, ata nuk flasin, por shpirti i tyre këndon ‘Rama ik’.
Koha për lojërat e Edi Rama po merr fund. Kufoma politike që i dridhej dora tek lexonte plagjiaturën në Lezhë, tregon qartë se pushteti ka vdekur moralisht. Por ai duhet të marrë fund edhe politikisht. E mori pushtetin me kriminelët, tani kriminelët po i bën apo do t’i bëjë kryetarë bashkie. Ndërsa ora numërohet mbrapsht, ke vetëm një rrugë Edi Rama, “Rama ik”! Ik, qeveri tranzitore, zgjedhje parlamentare, një parlament të popullit është rruga e vetme europiane e zgjidhjes së kësaj krize. Dhe ne jemi këtu për zgjidhje europiane e nuk do të pranojmë asgjë më pak”.
