Kryeministri Edi Rama ka mbajtur një konferencë për shtyp, ku foli për Samitin e Triestes, të mbajtur para dy ditësh.
Pas përfundimit të fjalës së tij, Rama iu përgjigj pyetjeve të gazetarëve lidhur me largimin e ministrave teknikë, procesin e negociatave me BE-në, lidhur me listën e famshme me emrat e nëpunësve të akuzuar nga qytetarët për abuzim detyre, si dhe me atë që Rama quan “koalicion me qytetarët”.
Kryeministri tha për ministrat teknikë se kanë mbaruar detyrën e tyre, ndaj ai po pret që të japin dorëheqjen:
Unë nuk jam zotuar se do i shkarkoj, kam thënë se do largohen dhe pres që të largohen sepse nuk kanë më arsye të qëndrojnë. Misioni i tyre ka mbaruar m sukses të plotë dhe pres të largohen.
Për sa u përket çeljes së negociatave të Shqipërisë për anëtarësimin në BE, Rama tha se ne i kryem të gjitha detyrat tona me nisjen e procesit të Vettingut, por nuk habitet edhe nëse BE nxjerr sërish një tjetër kusht:
Shqipëria ka kërkuar çeljen e negociatave, ne i kemi kryer detyrat tona me nisjen e procesit të Vettingut. BE mund të vazhdojë të bëjë atë që kërkon të shohë gishtin ndërkohë që gishti tregon hënën, ata mund të nxjerrin sërish ndonjë kusht, nuk është ndonjë çudi nëse e bëjnë, ne i kemi kryer detyrat tona. Për ne procesi i integrimit nuk është një udhëtim për të shkuar në Bruksel, por për të ndërtuar Shqipërinë evropiane këtu.
Por, me negociata, pa negociata hapat do vazhdojnë. Kemi bërë pjesën më të madhe të punës, ndërkohë që disa vende duhet të kërkojnë nisjen e reformave në drejtësi, këto janë paradokset.
Ndërkohë, lidhur me publikimin e emrave të nëpunësve të cilësuar si abuzues nga komentuesit, Rama habiti teksa tha se nuk ka publikuar asnjë listë, por e ka parë raportin pasi është publikuar, ashtu siç e ka parë çdo qytetar:
Nuk ka asnjë listë të publikuar nga unë, nuk ekziston. Emrat në atë përmbledhje janë pjesë e një raporti të bërë nga skuadra e shënimeve që kemi ne në mënyrë mekanike për ndjekësit e faqes. Asnjë nga ata persona nuk është në akuzë, as nuk është bazë për ndonjë procedurë administrative, është thjesht përmbledhja e komenteve të bëra në një faqe.
Gjithë këtë peshë që ajo listë nuk e ka e keni vënë ju dhe ata që duan të bëjnë politikë opozitare dhe s’dinë si ta bëjnë. Të gjithë të tjerat janë dokrra. Unë s’kam bërë asnjë përmbledhje, është raporti i bërë nga skuadra e shënimeve të cilën unë e kam lexuar siç e keni lexuar ju, kur është publikuar.
Në fund, Rama e përmbylli fjalën e tij me një ton të ashpër, teksa ritheksoi se “s’keni parë asgjë akoma”, ndërsa tha se armiqtë e qeverisë janë parazitët në zyrat e shtetit që paguhen me taksat e shtetit, por abuzojnë me detyrën e tyre:
Dhe lulet mos më prek nuk duhet të preken fare se nuk kanë parë gjë akoma. Po ndërtojmë një mekanizëm ferri për ata që paguhen me taksat e shqiptarëve dhe abuzojnë me ta. Ky mekanizëm do jetë ligjor, demokratik dhe transparent i koalicionit tonë me qytetarët e zakonshëm. Për ne në 4 vitet e ardhshme, opozita janë grabitqarët e qytetarëve, armiqtë publikë janë parazitët në zyrat e shtetit./ TIRANA TODAY
https://www.facebook.com/edirama.al/videos/10154950818141523/
