Një ditë pasi SHBA vendosi të njohë si president të Venezuelës liderin e opozitës, Juan Guaido, edhe kryeministri Rama pasoi në gjurmët e Donald Trump. Pasi kreu i opozitës së Venezualës, Juan Guaido u shpall president i përkohshëm, vjen një reagim nga kryeministri Edi Rama.
Përmes një postimi në Twitter, kreu i qeverisë pohoi se Shqipëria e njeh Guaidon si kreun e shtetit të Venezuelës. “Shqipëria njeh Juan Guaido si Presidentin e Përkohshëm të Venezuelës. Në emër të popullit të Shqipërisë i uroj Guaidos dhe venezuelianëve të guximshëm suksese në eliminimin e fuqive të paligjshme që e kanë kthyer vendin e tyre në ferr për popullin e vet. #Venezuela e lirë”, shkruan Rama në Twitter, teksa rreshton qëndrimin e Shqipërisë krah SHBA-ve.
Por ndërkohë Venezuela rrezikon që të zhytet në një krizë shumë të rëndë, pasi kontrollin e ushtrisë vazhdon ta ketë sërish lideri Nicolas Maduro, pasuesi i Hugo Chavez.
Udhëheqësi i Venezuelës, Nicolas Maduro, i ndërpreu marrëdhëniet me Shtetet e Bashkuara, pasi Uashingtoni njohu liderin e opozitës, Juan Guaido, si president të përkohshëm të vendit. Maduro u dha 72 orë kohë diplomatëve amerikanë që të largohen nga vendi i tij. Të mërkurën, Guaido e shpalli veten president gjatë protestave masive antiqeveritare.
Venezuela është në një rënie të lirë ekonomike nën drejtimin e Maduros. Miliona njerëz kanë braktisur vendin, pasi mungojnë edhe gjërat më bazike.
