Kryeministri Edi Rama ka zhvilluar pasditen e kësaj të premte një takim me të rinjtë në Elbasan, ku prezantoi kandidatët për deputetë në zgjedhjet e 11 majit. Gjatë fjalës së tij, ai nuk i kurseu ironitë ndaj ish-kryeministrit Sali Berisha, duke komentuar shfaqjen e tij në një konferencë me një buf.
“Po më tregonin se kishte dalë bufi. E kishte pranuar që është buf i herë. Ky është hapi i parë. Kishte thënë se bufi është një gjë shumë e mençur, që në shekuj është vlerësuar për mençurinë e vet dhe e kanë mbajtur si simbol. Bufin e kënetës së vërtetë e respektojmë, por jo kur vjen në Tiranë për të bërë politikë,” tha Rama.
Kryeministri ironizoi më tej, duke thënë se Berisha dhe aleatët e tij po premtojnë një “Shqipëri Madhështore” dhe përmendi me ironi Kujtim Gjuzin, duke e quajtur atë më seriozin e gjithë koalicionit. “Boll t’i shohësh mustaqet, i ka madhështore,” shtoi Rama me humor.
