Ngërçi politik në vend po pengon integrimin e Shqipërisë në Bashkimin Evropian, fakt ky i pohuar publikisht nga ndërkombëtarët.
Tashmë, duket se kryeministri shqiptar po përdor një tjetër mënyrë për të arritur integrimin në BE.
Kështu, Rama ka kërcënuar se Bashkimi Europian do të përballet me një skenar makthi, nëse nuk lejon që Shqipëria dhe shtetet e tjera të Ballkanit të bashkohen me bllokun.
Por, cili është ky skenar makthi që mund të trembë BE-në?
Në një intervistë për Politico, Rama tha:
“Ka mungesë të të kuptuarit ose mungesë të vizionit për të mos e kuptuar se ky rajon ka nevojë për Europën, por Europa, gjithashtu, ka nevojë për këtë rajon dhe për një Europë të sigurt.
Si mund të jetë bashkimi i sigurt, nëse Ballkani do të çmendet? Si mundet që Bashkimi Europian të lejojë në zemrën e vet, një zonë gri, ku aktorët e tjerë mund të kenë një ndikim më të madh sesa vetë BE-ja? Kjo është e pakuptimtë në aspektin e sigurisë.
Mënyra e vetme për të mbajtur Ballkanin në këtë mënyrë paqësorë dhe bashkëpunues, është të mbash rrugën drejt BE-së, dhe të mbash perspektivën e qartë.
Askush nuk dëshiron të kthehet në vetvete dhe të kërkojë sindikata më të vogla, të gjithë do të donin të bashkoheshin në bashkimin e madh. Por, nëse nuk ka asnjë shpresë, asnjë perspektivë, pa hapësirë, atëherë sigurisht mund të ndodhin sindikata të vogla”, paralajmëroi Rama, duke lënë të hapur mundësinë e bashkimit mes shteteve.
