Kryeministri Edi Rama ka mbledhur sot për herë të parë pas fitores së thellë në zgjedhjet e 25 qershorit, 74 deputetët e rinj të PS-së.
Gjatë fjalës së tij, Rama falendëroi ndër të tjerë edhe ish-kreun e LSI-së, Ilir Metën për bashkëpunimin në mandatin e kaluar.
Gjithashtu, kryeministri Rama e porositi ish-aleatin e tij që të reflektojë një orqë e më parë dhe të sillet si presidenti i zgjedhur e vendit, në mënyrë që të riparojë, sipas Ramës figurën e Presidentit.
FJALA E RAMËS:
Mbështetja e këtyre përmasave nuk është aq shumë vlerësim, se besim. Mos justifikimi i këtij besimi do ishte fatal për PS-në. Ju falendëroj të gjithëve për angazhimin e madh e makinerisë më efikase që unë mbaj mend që prej 2007-ës.
Faleminderit të 12 udhëheqësve të qarqeve. Faleminderit të gjithë tjerëve që drejtuan me frymë skuadre dhe një për një të gjithë deputetëve të zgjedhur që e mbuluan zonën zgjedhore me aftësi të jashtëzakonshme. Edhe deputetet jashtë vijës së kuqe meritojnë falendërim.
Rezultati është i jashtëzakonshëm, ndërsa ju kërkoj të mbështesim dhe të ndihmojmë njëri-tjetrin duke përcjellë shembullin e mirë me moton një për të gjithë dhe të gjithë për nji. Falendërim i posaçëm për çdo kryetar bashkie, kanë qenë të përkushtuar dhe kjo ju bën shumë nder.
Dua të falendëroj ish kryetarin e partisë në koalicionin qeverisës, jo për gjërat që i çoi për dreq, duke hedhur në erë projektin e së majtës së bashkuar për çdo kontribut që dha. I lutem të reflektojë një orë e më parë dhe të kthjellohet si presidenti për të qenë konsensual dhe jo konfliktual dhe të përqendrohet te riparimet që duhet t’i bëjë figurës së Presidentit.
LSI para Shqipërisë është një vrimë në ujë dhe roli i tij nuk duhet ta damkosë figurën e presidentit. Falendëroj dhe ministrat e LSI-së u uroj shëndet dhe mbarësi në familje dhe sa më shumë kontribute në detyrën aspak të lehtë të opozitarëve.
Konfirmoj që marrëveshja e 18 majit mbetet një busull orientuese në marrëdhëniet qeveri-opozite. Prioriteti ynë është nxjerrja e mësimeve të këtij mandati përmes një reflektimi shumë serioz./ Tirana Today
