Kryetarja e LSI-së, Monika Kryemadhi ka sulmuar sërish sot kryeministrin Rama, teksa tregoi sipas saj arsyet përse ai s’mund të pranojë vetting politik.
“S’mund të pranojë Edi Rama vetting politik, kur bashkëshortja e tij drejton një bankë offshore që s’dihet se paratë e kujt janë. Si mund të pranojë Edi Rama vetting politik, kur paratë që u vidhen qytetarëve me koncesione, nuk dihet se ku shkojnë, por përdoren për pastrim parash”, tha Kryemadhi, ndërsa më tej akuzoi kryeministrin se është përdorues droge.
“Vettingut politik t’i shtojmë analizën e drogës, t’ia matim njëherë, se dje kishte ardh edhe me antiplumb. Edi Rama është peng i mallit që i shesin, se varet çfarë malli i shesin. Duhet të shtojmë edhe kartelën mjekësore, nga çfarë vuan?
Ka problem shumë më të madh, përballjen me vetveten. Kemi dëgjuar njeriun modern e trendi, që merr vesh nga çdo gjë, por në fakt merr vesh nga psikopatia. Edi Rama është bërë si këto shtejzovallet që i shkelin syrin njëherë njërit e njëherë tjetrit, por harron që para interesave kombëtare, nuk ka shkelje syri.”
Më tej Kryemadhi iu drejtua ambasadave që janë në Shqipëri, tek të cilat shprehu shqetësimin se qeveria Rama nuk ka në plan integrimin e Shqipërisë, por shkatërrimin e saj.
“U drejtohem ambasadave që janë ën Shqipëri, jemi në komunikim me ju prej ditësh për integritetin e Shqipërisë. Duhet ta kuptoni se ky sekt kriminal ka vetëm 1 qëllim: vdekjen dhe shkatërrimin e këtij vendi. Ky kryeministër që është vetëm një kriminel i kapur nga bandat, peng i kokainës, nuk është gjë tjetër veçse shkatërrim për rajonin dhe Evropën.”/ TIRANA TODAY
