Kryeministri Edi Rama ka drekuar me fermerët e Vlorës. Ai ka folur për arritjet në bujqësi, ndërsa mikpritësit e kanë vlerësuar dhe uruar.
Një prej banorëve, në nisje të drekës, ka kërkuar të ngrejë një dolli për kryeministrin. “Kam qejf t’i pimë një dolli kryeministrit”, tha ai.
Nga ana tjetër, Rama ka pranuar dollinë, por tha se ai vetë nuk pi, sepse po e shohin në televizor. Kryeministri i uroi banorët e zonës me pije jo alkoolike, ndoshta për të treguar se gjatë ushtrimit të detyrës dhe para popullit është i përgjegjshëm dhe nuk kërkon që të dehet.
Pas dollisë, kryeministri Rama ka folur për situatën politike në vend, duke hedhur akuza ndaj ish-kryeministrit Berisha, kryetarit të PD-së, Basha dhe kreut të LIBRA-s, Blushi.
Gjithashtu, Rama tha se fenomeni i hashashit ishte më tepër një fenomen i hapur nga opozita dhe se ata ishin shkaku i bllokimi të procesit të Vettingu-t.
“Hashash e hashash, fol e u dehën fare, u bënë tapë ata të çadrës. Përfitojnë nga thashethemet e mëdha. Ishte shqetësuar dhe Ben Blushi për bletët, që është dhe njeri i lexuar, ai njeh grerëzat. Ta kam fjalën që vijnë nga thashethemet. Kishte nxjerr Saliu trenin me skrap, dhe ja mbeturinat kalojnë, turp, vetëm gënje e shpif, duke përfituar nga mërzia e njerëzve.
Nuk ke pse ikën në momentin kur duhet të votohet Vettingu. Saliu nuk di të ndërtojë, vetëm të prishë di. Nuk pastrohej Tirana, plehra gjithandej. Nuk e kanë sensin e shtetit, janë tamam tokë e xanun”, tha Rama në tavolinën e shtruar me fermerët.
Kryeministri Rama me veprimet dhe retorikën e tij, kërkoi që t’u tregojë shqiptarëve se cilët janë ata që dehen dhe nuk mbajnë përgjegjësi se çfarë thonë dhe bëjnë gjatë ushtrimit të funksionit publik.
