Konflikti mes Iranit dhe SHBA ku janë përfshirë dhe vendet e Gjirit Persik ka ndikuar negativisht në turizmin e këtyre vendeve por dhe Turqisë. Frika dhe pasiguria ka bërë që turistët të kthejnë sytë nga Ballkani dhe shifrat e muajit mars tregojnë se një pjesë e konsiderueshme e tyre kanë zgjedhur Shqipërinë. Çka konfirmohet edhe nga kryeministri Rama.
“Ndërkohë që, të jeni të sigurt, ne kemi parë shifrat e Marsit. Marsi në krahasim me marsin e kaluar është shumë fortë. Edhe kini parasysh që ajo që ndodh për fat të keq, me thënë të drejtën se ato janë të gjitha vende me të cilat, ne kemi marrëdhënie shumë të afërta, po ajo që ka ndodhur në vendet e Gjirit, që ka ndodhur me Turqinë po ashtu, që ka ndodhur me Qipron, të gjitha ato vende do kenë rënie dhe ne duhet ta marrim një pjesë sado të vogël të asaj që bie andej dhe do vijë këtu.”
Por për t’i mbajtur këta turistë Rama u kërkon sipërmarrësve në sektorin e turizmit dhe agroturizmit të jenë strategjik dhe të mos mendojnë afatshkurtër duke abuzuar me çmimet.
“Nuk duhet t’ju gënjejë kjo masa e madhe që vjen për të zgjatur dorën më shumë sesa duhet për t’i marrë me çmimin e ekzagjeruar ato që normalisht duhet të merren hap pas hapi, sepse kjo do garantojë që të rritet reputacioni edhe që të krijohet stabilitet.”
Këshilla e kryeministrit është të bashkëpunojnë me vendet e Gjirit Persik për burimet njerëzore pasi sezoni turistik në Shqipëri përkon me një periudhë kur këto shtete vuajnë mungesën e turistëve për shkak të temperaturave të larta.
“E bëjnë shumë në vendet e Gjirit ku në kohën ku ka shumë punëtori të kualifikuar, ka dhe shumë shqiptarë që punojnë atje, që në kohën e verës kur ne kemi bumin e turizmit, ata nuk kanë njeri atje. Kështu që, shikoni dhe mundësinë që të bëni marrëveshje dhe kështu ndani dhe kostot me një restorant atje, një klub atje. Nuk flas për hotelet e mëdha, flas për këto të voglat që kanë kamerierë, kanë kuzhinierë edhe që praktikisht ata i paguajnë dhe ata rrinë kot se në kohën e verës atje s’shkon njeri, është temperatura shumë e lartë. Kjo është njëra që desha ta them.”
Gjatë një takimi informues me sipërmarrës në kryeqytet Rama foli dhe për opozitën që sulmon sipas tij çdo nismë të qeverisë edhe kur ato bëhen për t’ju ardhur në ndihmë investitorëve.
“Ka shumë “helm” që hidhet çdo ditë këtu, siç besoj mund ta keni parë, mund mos ta keni parë, rezistencën idiote që u bë për një ndryshim krejt të thjeshtë për portet në parlament, aq sa u vu alarmi edhe në Bashkimin Europian. U çua nga këtu atje, se në këtë pikë domethënë jemi i pari dhe unë jam i bindur, i fundit vend kandidat në historinë e zgjerimit të Bashkimit Europian, që “eksportojmë baltë dhe helm” nga kryeqyteti ynë drejt kryeqyteteve të tjera dhe u tha që “qeveria po ndryshon ligjin se do t’i japë oligarkëve portet pa garë. Në fakt, ndryshimi është i domosdoshëm për të mos penguar dhe për të mos vonuar dhe marrë zvarrë, investitorët të cilët investojnë në bregdet në pronat e tyre, dhe vijnë me një projekt që ka dhe një pontil apo një marinë të vogël dhe përgjigjja që marrin është: “mund ta marrësh lejen për këtë pjesën tjetër, për pontilin dhe për marinën duhet bërë tender”. Sepse në ligjin ekzistues, normal, duke qenë se deti është nën administrimin total të shtetit, për portet turistike që ndërton, që nxjerr në garë qeveria, bëhet garë, ndërsa t’i thuash tjetrit që “ti investoje gjithë këtë këtu, po për parkimin, se porti është një parkim i anijeve, për parkimin do bëjmë një garë’’, i bie që të krijosh “territore luftrash” midis le njëherë që ai që bën investimin do të thotë “po heq fare pontilin’’.
Një tjetër nismë e qeverisë që është atakuar nga opozita duke e cilësuar si instrument që synon t’u falë toka oligarkëve Rama thotë se është dhe paketa e maleve.
“Kjo paketë edhe është shumë pro biznes, është shumë e favorshme dhe është absolutisht e bazuar tek e drejta e trashëguar e pronës. Nuk është absolutisht e bazuar tek “hajde, se kemi Paketën e Maleve të japim ca toka në mal” se nuk kemi nevojë ta bëjmë këtë gjë, nuk është fare ky qëllimi e tjerë, e tjerë. Kështu që, kush ka dëgjuar që kjo bëhet për t’ia dhënë atyre kulakëve, se “oligark” është transplantimi i kulakut në zhargonin demokratik dhe këtë transplantim e kanë bërë dhe e përdorin ata që thonë se kanë luftuar komunizmin, por ato mbetje toksike të komunizmit i kanë kokë. Edhe kush është armiku i popullit? Kulaku! Kulak nuk e themi dot, shpikim oligarkun. Fjala “oligark” nuk ka lidhje fare me realitetin shqiptar. Në Shqipëri nuk ka oligark që të jemi të qartë, se oligarku është dikush që vendos, nuk është dikush që bën biznes edhe përfiton dhe ky projekt, ky program është thjesht dhe vetëm për ata që duan të zhvillojnë tokën e tyre, duan të rindezin oxhakun në shtëpinë e gjyshërve të tyre, duan të ndërtojnë një fermë, duan të ndërtojnë një agrobiznes, duan të ndërtojmë një pikë agropërpunimi në fshat dhe do të kenë të gjithë mbështetjen tonë.”
Kryeministri u ndal gjatë të shpjegonte dhe iniciativën “Dyfisho ndërmarrjen tënde”, e cila synon të fuqizojë ndërmarrjet e vogla dhe të mesme që janë të përqendruar tek prodhimi.
