Kryeministri Edi Rama tha të premten se është e dhimbshme, por nuk mund të legalizojë banesat në gjurmën e Unazës së Re në kurriz të interesit publik, pasi e ndalon ligji.
“Ne nuk mund të legalizojmë në kurriz të interesit publik dhe në interes të taksave, buxheteve të familjeve dhe të buxhetit të familjes tonë të madhe aty ku është e pamundur. Nuk është e mundur, është shumë e thjeshtë, nuk është e mundur. E dhimbshme, por e thjeshtë”, tha Rama në një takim me banorët e Libofshës, të cilëve u shpërndau certifikatat e pronësisë.
Kreu i ekzekutivit akuzoi opozitën se po udhëheq protestën e parë duke kërkuar atë që ligji e ndalon.
“Ka qysh kur filluan prishjet masive tek Parku Rinia në Tiranë dhe në të gjithë Shqipërinë, që të gjitha qeveritë, të gjitha bashkitë, kanë prishur dhe kurrë nuk ka pasur një protestë të udhëhequr nga opozita politike, për të kërkuar atë që ligji e ndalon. Pse? Për një arsye shumë të thjeshtë, për të mbrojtur interesat e ngushta politike. Edi Ramën se mundim dot me votë, atëherë hajde t’i vëmë flakën kësaj pune, kudo ku na del një mundësi që të hedhim benzinë.”
