Studentët edhe sot do të bojkotojnë mësimin, ndërsa kanë lajmëruar që të mblidhen në orën 10:00 tek Korpusi Universitar. Protesta ka hyrë sot në ditën e saj të 16, e ndërsa studentët thonë se janë më të bashkuar se kurrë më parë.
“Aty ku nisi historia e arsimit shqiptar. Aty për të vënë me shpatulla pas murit të gjithë bashkëfajtorët e këtij sistemi arsimor!
Korpusi është godina e parë universitare e ngritur, pra përfaqëson UT nga e cila dolën të gjithë universitetet e tjera.
Aty duhet të jemi të gjithë më të bashkuar se kurrë, për të cuar zërin tone ne veshin e të gjithë FAJTOREVE!”, thuhet në njoftimin e studentëve në rrjetet sociale.
Po kështu, të tjerë studentë kanë lajmëruar se do të mblidhen në tryeza diskutimi, për të vendosur për ecurinë e aksionit të tyre. Njoftimet janë bërë në rrjetet sociale, duke vendosur hashtagun “Rama nuk je i mirëpritur”.
