Djali i miliarderit George Soros, Alex Soros, ka vizituar bregdetin shqiptar të jugut. Aleksandër Soros ka publikuar edhe një foto në Instagram me kryeministrin Edi Rama.
Në postimin e tij në Instagram, Soros shkruan se është shumë i lumtur që po kalon kohë me Ramën.
“Fantastike të jem sërish në Shqipëri dhe të kaloj pak kohë me kryeminstrin Edi Rama, njeriun më vizionar dhe të diskutojmë mbi progresin e Shqipërisë drejt integrimit evropian dhe bashkëpunimit rajonal”, shkruan ai në Instagram.
Ndërsa më parë në nëntor të vitit 2017, Alex Soros ndodhej në Shqipëri, në një vizitë ku u takua me në zyrën e Kryeministrit me Ramën. Fotoja në atë kohë është publikuar nga Alex Soros në adresën personale në Instagram.
Djali i miliarderit shprehej me superlativa për vizionin e Edi Ramës si Kryeministër. Gjithashtu ai vlerëson dhe zyrën e kreut të qeverisë, e cila shquhet për pikturat shumëngjyrëshe.
“Ishte kënaqësi të takoja kryeministrin shqiptar, vizionarin Edi Rama në Tiranë, në një nga zyrat më unike dhe më të ngrohta që një kryetar qeverie mund të ketë. Nuk mund të presësh më pak nga një artist bashkëkohor, shkrimtar dhe ish-lojtar profesionist i basketbollit”,- shkruante Alex Soros në tekstin që shoqëron foton e tij me Edi Ramën.
