Kryeministri Edi Rama po zhvillon një takim në Belsh, ku ka kërkuar ndihmën e banorëve për të qeverisur, ashtu siç ai e quan, “pa mbajtur të tjerë në prehër për të drejtuar timonin”.
Kreu i PS-së tha gjithashtu se legalizimi është një proces që mund të realizohet vetëm nëse kjo parti qeveris e vetme.
“Na jepni timonin që të mos kemi ngadalësime, kthesa, ngatërresa e të shantazhohemi nga ata që thonë nuk vij në parlament, po s’më dhe drejtorin e pyllit. Na jepni timon që të bëjmë 100% legalizimin e shtëpive, të të gjitha shtëpive pa dallim që kanë hedhur gjakun, djersën e lotët për të ndërtuar shtëpitë.
Por, si mund ta bëjmë ne 100% legalizimin nëse lejen ta jep i madhi dhe hipotekën nuk ta jep i vogli?”, tha Rama gjatë fjalës së tij.
Ndër të tjera, kryeministri shtoi se ata që kanë dilema për votën, duhet të mendojnë se kë do të donte të votonte Ismail Qemali më 25 qershor:
“Në 4 vitet e ardhshme nuk do të ketë asnjë tatim për fshatin. Ju lutem të gjithë atyre të fshatrave, mos u ndani në të majtë e të djathtë. Të mos shkojmë në qendrën e votimit si në stadium. Të shkojmë për familjen, për tokën, për kombin me Partinë Socialiste. Nëse nuk na çlironi nga ata që e duan një dorë në timonin e qeverisjes, atëherë nuk do ia dalim kurrë të mbajmë premtimin dhe nuk do mund të japim certifikatat e pronësisë për tokën, pasi duhet të çlirojmë hipotekat. Në 25 qershor jepini dërrmën këtij sistemi, 27 vjet që ka brenda kancerin dhe metastazat që kanë përhapur partitë e pushtetit. Nuk kërkojmë më shumë pushtet për mua, por kërkon më shumë fuqi për të bërë shumë më shumë për ju.
PS sot është mishërimi i vizionit kombëtar. Flamuri kuqezi duhet të valëvitet krenar në oborrin e BE-së. Na jepni fuqinë e shpresave tuaja dhe ju siguroj se 40% do të rriten rrogat në mandatin e ardhshëm. Na jepni fuqinë e revoltës tuaj ndaj gjykatësve të korruptuar e do shihni se si do shkojnë në burg.
E qajnë ditën dhe e rrjepin natën. U them demokratëve lëreni PD-në ku është. Mbajeni në zemër dhe më 25 qershor votoni si shqiptarë.
Nëse keni dilema, mbyllni sytë dhe mendoni çfarë përgjigje do ju jepte Ismail Qemali po t’i thonit kë të votojmë më 25 qershor.”/ Tirana Today
