Kryeministri Edi Rama duket se këtë vit fushatën e tij elektorale e ka përqendruar te gratë.
Ai ka deklaruar se fuqia e këtij vendi janë gratë dhe shpesh në fushata thotë se e keqja e këtij vendi nuk vjen nga burrat por nga gratë.
Kreu i qeverisë në mitingje thotë se gratë janë “Ministria e Brendshme” në shtëpitë e tyre.
Rama, hera-herës, reciton vargje të Çajupit, “Burrat nën hije lozin, kuvendojnë, pika që s’u bie se nga gratë rrojnë” duke thënë se gratë janë ato që drejtojnë dhe punojnë më shumë për familjet dhe po ashtu për të ardhmen e vendit.
Ai gjithashtu sulmon kundërshtarin e tij politik, Lulzim Bashën për mungesën e grave në listat e Partisë Demokratike duke u thënë kudo që shkon se kundërshtari i tij nuk i merr në konsideratë gratë.
Po ashtu, Rama çdo miting e mbyll me porosinë për gratë demokrate që mos ti lënë burrat e tyre për të votuar PD-në.
Kryeminsitri i vendit, në profilin e tij të “Facebook-ut”, ka postuar një foto me një grua, duke e konsideruar si foton e ditës.
Me këtë foto, Rama kërkon që të konfirmojë të gjithë retorikën e fushatës së tij.
Por, disa nga komentuesit nuk janë dakord me këtë postim. Ata i shprehin indinjatën e tyre ndaj politikës së kryeministrit.
“I njëjti film, e njëjta histori, i kapni për dore deri më datën 25 qershor pastaj në datën 26 i fusni shkelmin”, shkruan komentuesi.
Ajo që vihet re, është se strategjia e komunikimit për të vazhdon të jetë e njëjtë.
Në zgjedhjet elektorale të vitit 2013, Rama ka hedhur thuajse të njëjtën foto, i kapur për dore me një burrë.
Fushata elektorale e katër viteve më parë ishte e përqendruar te burrat.
Kryefjala e fushatës në vitin 2013 ishte “Rilindje” duke iu referuar kohës së “Rilindasve” në letërsi.
Rama, para 4 vitesh kishte si qëllim të ngjallte te burrat shqiptarë dëshirën për të bërë shtet, ashtu si në kohën e rilindësve, ku ata dhanë gjithçka të tyren personale vetëm për të bërë shtetin shqiptar.
E njëjta taktikë duket se po ndiqet edhe këtë 4-vjeçar, por vetëm se nuk janë meshkujt ata që ai u drejtohet por këtë vit janë femrat.
Rezultati i 25 qershorit është ende mister, por ajo që themi me siguri është që strategjitë e komunikimit funksionojnë, pavarësisht rezultatit dhe se çfarë ndodh me burrat dhe gratë shqiptare pas zgjedhjeve elektorale.
