Kryeministri, Edi Rama, në një prononcim për mediat, ditën e sotme, i ka dërguar një mesazh të qartë aleatit të tij, Ilir Meta, se nuk ia ka dhënë kush privilegjin për t’u tërhequr nga qeveria pasi, sipas Ramës, ministrat kanë përgjegjësi kushtetuese përpara qytetarëve.
“Unë e konsideroj qeverinë përgjegjësi, dhe detyrat qeverisë i shoh si përgjegjësi dhe jo privilegje nga të cilat i ke dhe heq dorë. Nga kjo përgjegjësi ne nuk mund të heqim dorë për sa kohë jemi mandatuar nga populli. Nga ana tjetër, çdo gjë në funksion të adresimit në Kodin Zgjedhor të çdo lloj shqetësimi që mund të ketë opozita në bashkëpunim me OSBE-ODIHR-in dhe për ço mekanizëm që mund të krijohet në funksion të forcimit të garancive psikologjike për opozitën, pasi në këndvështrimin tim nuk ka nevojë, për këtë duhet të ulemi”, u shpreh Rama.
