Opozita ka braktisur punimet e Kuvendit, menjëherë pasi kryeparlamentari Gramoz Ruçi i mbylli mikrofonin kreut të PD-së Lulzim Basha, i cili vijoi të akuzonte ministrin e Brendshëm Fatmir Xhafaj. Por, pas largimit të opozitë fjalën e ka marrë kryeministri Edi Rama, i cili ka marrë në mbrojtjet ministrin e tij.
Duke folur para deputetëve socialistë (opozita ishte larguar nga salla), Rama tha se çështja e vëllait të Xhafaj është e njohur dhe partnerët ndërkombëtarë janë në dijeni të kësaj situate dhe nuk kanë folur asnjëherë.
As ambasadori amerikan Donald Lu nuk ka reaguar për këtë çështje, theksoi Kryeministri, duke sqaruar se ministri Xhafaj nuk ka asnjë përgjegjësi në lidhje me vëllain e tij, i cili është dënuar në Itali për trafik ndërkombëtar droge.
“Dje ministri i Brendshëm foli dhe nuk tha asgjë të re, përsëriti atë që ka thënë në harkun kohor të 15 viteve të fundit. Fakti është i njohur botërisht. Por fakti është i njohur jo vetëm për ata shqiptarë, por është i njohur edhe nga partnerët ndërkombëtarë. Dhe nëse në këtë zurna do të kishte një grimcë të vërtete lidhur me përgjegjësi të çfarëdo natyre të ministrit tonë të Brendshëm, asnjë shqiptar nuk e quan të paarsyeshme bindjen time se përpara se të flisnin këta do kishte folur miku ynë ambasadori amerikan, do kishte folur Bashkimi Europian, do kishin folur ata të cilët nuk kanë lënë rast pa folur pasi nuk kanë lënë rast pa verifikuar. Ata as kanë folur dhe as kanë për të folur. Dosja e atij zbulimit në të njëjtën kohë që ka dalë në televizor, ka filluar të shpërndahet në anglisht dhe unë e kam mësuar se çfarë do thoshin këta në televizor, nga ata që dosjen e kishin lexuar anglisht”, tha Kryeministri Edi Rama.
