Partia Socialiste pritet të përfshihet nga ndryshime drastike. Kryetari i PS Edi Rama, mblodhi mëngjesin e ditës së djeshme Kryesinë e partisë. Mësohet se kreu i qeverisë ka kërkuar të dijë se si po shkojnë takimet e nisura në bazë nga drejtuesit politikë. Një çështje tjetër e diskutuar mësohet se ka qenë ecuria e zgjedhjeve për drejtuesit e rinj të organizatave të partisë, me qëllim për t’i dhënë impulse të reja bazës. Mësohet se në PS do bëhet një analizë që këta drejtues të bazës kanë pasur në zgjedhjet e fundit. Do të analizohet puna e tyre në fushatë dhe nëse do të shihet që ka pasure rezultate jo të kënaqshëm do të ketë ndryshime Në takimin e mbajtur me dyer të mbyllura morën pjesë edhe drejtuesit e qarqeve dhe disa anëtarë të kabinetit qeveritar. Në kongresin e 8 dhjetorit është lënë detyra për riorganizimin e PS në funksion për zgjedhjet e vitit të ardhshëm. Muajin e ardhshëm, pritet që Partia Socialiste të mbledhë edhe Asamblenë Kombëtare. Brenda marsit mund të ketë ndryshime drastike që rrezikojnë largime ministrash.
Ndryshime të reja
PS pritet të pësojë ndryshime të forta në radhët e saj se zgjedhjet brenda partisë dhe kjo do të vijë nga SPAK. Drejtësia e re ka nën hetim më shumë se gjysmën e qeverisë, kryebashkiakë dhe zyrtarë të lartë në administratë. Nën rrethin e kuq të SPAK është dhe kryeministri Rama. Në këtë situatë, kryesocialisti është i detyruar të zbatojë skenarin e reformës në qeverinë e tij, por këtë herë ai ka zgjedhur një metodë ndryshe. Ai do t’i bëjë ndryshimet pjesë-pjesë në qeveri. Së fundmi, kryesocialisti ka njoftuar krijimin e ministrisë së re të Shtetit për Administratës Publike dhe Antikorrupsionin duke propozuar në krye të dikasterit Adea Pirdenin e cila aktualisht mban postin e zëvendës ministres së Drejtësisë. Kryeministri tha se krijimi i ministrisë së re vjen si pasojë e nevojës për një qasje ndryshe ndaj administratës publike për të rritur cilësinë e burimeve njerëzore si dhe gjithashtu për një harmonizim më të mirë të politikave antikorrupsion me institucionet e qeverisë.
Forcimi i pozitave të Blendi Gonxhes
Pra ndryshimet filluan dhe këtë e paralajmëroi gazeta “SOT” edhe pak ditë më parë, ku Rama njoftoi se Ministria e Kulturës është shkrirë dhe bashkë me të është larguar Elva Margariti. Ai propozoi krijimin e një ministrie të re, që do të quhet Ministria e Ekonomisë, Inovacionit dhe Kulturës. Në krye të saj është propozuar për dekretim te Presidenti, Blendi Gonxhe, një lëvizje e Ramës që pritet të ndryshojë ekuilibrat në ekzekutiv dhe të fusë në panik klanet brenda mazhorancës. Futja në lojë e Gonxhes do të nxjerrë jashtë loje Belinda Ballukun, si personazh që ka dosje të hapura me SPAK. Ajo mund të shkarkohet nga posti si zv/kryeministre dhe duke parë rolin dhe rifutjen në skenë të njeriut më të rëndësishëm të Ramës, Gonxhe mund t’i zërë edhe vendin. Mësohet se me këto zhvillime do të preket dhe Ministria e Transporteve dhe Energjisë, e cila mund të ketë një ndarje. SPAK ka marrë nën hetim zyrtarë të lartë në këtë ministri dhe hetimet e tyre japin sinjale për ndryshime të tjera të forta. Pra lëvizja e djeshme e kryesocialistit paralajmëron se në vijim PS mund të përfshihet nga të tjera “prerje kokash”, ku më të rrezikuar janë ministrat me dosje në SPAK. Do të ketë ndryshime tek Ministria e Arsimit dhe e Bujqësisë. Të rrezikuar të shkarkohen nga kryeministri janë Niko Peleshi dhe Manastirliu. Gjithashtu, pritet që Spiropali të fuqizohet dhe t’i besohet një rol i rëndësishëm në qeveri. Mbetet të shihet se çfarë lëvizjesh do të bëjë Rama deri në mars, pasi ai njihet si politikan i surprizave.
