Çelja e fazës mbyllëse të negociatave për anëtarësimin e Shqipërisë në Bashkimin Europian ka përkuar me 180-vjetorin e lindjes së shkrimtarit dhe rilindësit të shquar, Naim Frashëri. Përmes një mesazhi në rrjetet sociale, Kryeministri Edi Rama e ka cilësuar këtë përkim si një “mister të gëzueshëm” që lartëson aspiratën shekullore të kombit drejt familjes europiane.
Kreu i qeverisë u shpreh me mirënjohje të thellë për figurën e “Shqipëribërësit” të madh, duke thirrur “Orën e Mirë” të shpirtit të tij për mbarësinë e shtetit shqiptar. Më tej, Rama bëri me dije objektivin strategjik që përmes punës së përbashkët, Shqipëria e vitit 2030 të kurorëzojë anëtarësimin e plotë në BE.
Ky moment historik do të përkojë me 130-vjetorin e ndarjes nga jeta të poetit, vit i cili synohet të shpallet zyrtarisht si “Viti Europian i Naimit”.
“Është një mister i gëzueshëm, që drita jeshile për çeljen e fazës mbyllëse të negociatave të anëtarësimit në Bashkimin Europian dhe mbajtjen e Konferencës Ndërqeveritare Shqipëri-Bashkim Europian, të vezullojë në harkun e 180-vjetorit të lindjes së Naim Frashërit, udhërrëfyesit gjenial të aspiratës sonë shekullore drejt “Diellit që lind andej nga perëndon”.
Me mirënjohje të madhe e kujtojmë në këtë 25 maj “Shqipëribërësin” e madh dhe të pavdekshëm, duke e thirrur Orën e Mirë të shpirtit të tij për ditët e mira që paskëtaj vijnë për kombin e për shtetin tonë.
Me punën tonë të përbashkët, nën dritën e amanetit të tij dhe rilindësve tanë, e me ndihmën e Zotit Shqipëria 2030, do ta kurorëzojë atë vit të 130-vjetorit të vdekjes së Naim Frashërit si Vitin Europian të Naimit, vitin e “Diellit që lind andej nga perëndon. Dhe nëse siç tha Konica, kur u shtie në dhé Naimin e përcollën 300 shqiptarë, në Shqipërinë 2030 Shqipëribërësin e madh do ta kremtojë të gjallë një popull i tërë, i bërë njësh me familjen e Europës së Bashkuar”, ka shkruar kryeministri Edi Rama.
Kujtojmë se më 26 maj Komiteti i Përfaqësuesve të Përhershëm të Shteteve Anëtare të Bashkimit Evropian (COREPER) do të mbajë Konferencën e 8-të Ndërqeveritare Shqipëri-Bashkimi Evropian.
Mbajtja e kësaj konference hap zyrtarisht rrugën që Shqipëria të hyjë në fazën e mbylljes së negociatave për anëtarësim në Bashkimin Evropian.
Vendimi vlerëson progresin e qëndrueshëm të Shqipërisë në përmbushjen e prioriteteve kryesore të procesit të integrimit, veçanërisht në forcimin e shtetit të së drejtës dhe konsolidimin e institucioneve demokratike.
Po ashtu, theksohet progresi në reformën në drejtësi, duke përfshirë funksionimin e pavarur dhe efikas të institucioneve të drejtësisë, si dhe luftën kundër korrupsionit dhe krimit të organizuar.
Në fushën e të drejtave të njeriut, vlerësohen zhvillimet në lirinë e shprehjes dhe të medias, të drejtën e pronës, respektimin e pakicave kombëtare, si dhe barazinë dhe mosdiskriminimin, në përputhje me standardet e Bashkimit Evropian.
Bashkimi Evropian rikonfirmon mbështetjen për perspektivën evropiane të Shqipërisë dhe vlerëson angazhimin e institucioneve në zbatimin e reformave për forcimin e shtetit të së drejtës, konsolidimin demokratik dhe zhvillimin e qëndrueshëm ekonomik e shoqëror.
