Paketa ‘Pakti për Universitetin’ i ofruar nga Ministria e Arsimit nuk mbështetet nga studentët e Fakultetit të Shkencave Sociale.
Sipas tyre, pakti i mazhorancës nuk përbën asgjë më shumë sesa ritheksim të formalizuar të pikave më nevralgjike të Ligjit të Arsimit të Lartë, duke mos i dhënë zgjidhje konkrete krizës së shkaktuar në Arsimin e Lartë.
“Përkundër propagandës dhe tentativave qesharake të qeverisë dhe Ministrisë së Arsimit për ta shitur sa më mirë të ashtuquajturin ‘Pakt për universitetin’, studentët e Shkencave Sociale shprehen të vendosur për të vazhduar bojkotin deri në dhënien fund të kësaj farse. Pakti qeveritar nuk përbën asgjë më shumë sesa riktheksim të formalizuar të pikave më nevralgjike të Ligjit të Arsimit të Lartë, duke mos i dhënë zgjidhje konkrete krizës së shkaktuar në Arsimin e Lartë qysh prej implementimit të këtij ligji. Prandaj, vullnetplotë dhe të frymëzuar prej kolektivit universitar (studentë-pedagogë) bojkotues në Shkencat Sociale, po shpalosim si më poshtë programin e së hënës 21/01/2019: E duam Universitetin siç po e banojmë këtyre ditëve! Studentët e bashkuar kanë për të fituar!”, thuhet në një deklaratë të shperndarë në Facebook.
Kërkesat e studentëve mbështeten edhe nga pedagogët, që kanë deklaruar së do të ngujohen brenda ambienteve të fakultetit duke filluar nga dita e hënë.
