Në një intervistë me gazetaren Rudina Xhunga, në emisionin “Dritare”, në Vizion Plus, kryeministri i vendit, Edi Rama, ka folur edhe për çështjen e drogës në vend.
Rama përdori shprehjen e Skënderbeut të konvertuar me situatën aktuale në Shqipëri, duke thënë se “hashashin nuk e sollëm ne, por e gjetëm mes jush”, duke ia lënë kështu fajin qeverisë së shkuar.
“Hashashin nuk e sollëm ne, por e gjetëm mes jush. Kur erdhëm ne në pushtet, e gjithë Shqipëria ishte e mbjellë me hashash. Ne të gjitha komunikatat e policisë së shtetit i bëmë transparente, dhe çdo rrënjë e asgjësuar ka qenë e publikuar. Ju siguroj që ky vit është viti i fillimit të fundit të kësaj historie. Jemi shumë të mirë organizuar për t’i dhënë një kolpo kësaj industrie dhe për të kthyer përfundimisht faqen me këtë histori që nisi me çrrënjosjen e Republikës së Turpit në Lazarat. Megjithatë nuk mund të themi që s’do mbillet më asnjë rrënjë, kjo do të ishte e tepërt, por nuk do jetë më problem”, tha Rama.
