“Banda që lëshohen në emër të mjedisit”, kështu i ka quajtur kryeministri Edi Rama inspektoratet në vend, teksa zhvilloi sot një takim me sipërmarrës.
Gjatë fjalës së tij, Rama njoftoi se do bëhet një ristrukturim i plotë i inspektorateve, të cilat kanë marr urdhër të prerë që të mos vënë asnjë gjobë.
“Të rrinë nëpër shpia inspektorët dhe të lënë rehat njerëzit që të marrin frymë deri kur të bëhet ristrukturimi radikal i inspektorateve”, foli prerazi Rama.
FJALA E PLOTË PËR INSPEKTORATET:
Inspektoriatet kanë marrë urdhër të prerë që deri në ristrukturim nuk do vendosin më asnjë gjobë, asnjë gjobë! Të rrinë nëpër shpia inspektorët dhe të lënë rehat njerëzit që të marrin frymë deri kur të bëhet ristrukturimi dhe do bëjmë një ristrukturim radikal të inspektorateve, që e vërteta është që janë banda që lëshohen në emër të mjedisit, në emër të mbrojtjes së peshqve, të mbrojtjes së ajrit, të mbrojtjes së ujërave, të mbrojtjes së kullotave dhe marrin vetëm lekë!
Dhe kujt i bien në qafë, çdo njeriu që bën një punë! Çdo njeriu që merr një kazëm për të punuar, i shkojnë edhe i thonë jo po ndot, jo është zonë e mbrojtur, jo po ajrin e ke matur, pse bën zhurmë, jo muzikën e ke të lartë, jo po kto, jo po ato dhe bum e bum e bum e bum, gjoba dhe mbigjoba!
Këta duhet t’i largohen nga qafa popullit shqiptar!
