Kryeministri Edi Rama ka vijuar për më shumë se një orë deklaratën e drejtpërdrejtë ku ka komentuar ngërçin lidhur me dialogun me studentët. Këta të fundit janë sërish sot në protestë, ndërsa kanë kundërshtuar dialogun me Ramën, duke thënë se duan thjesht plotësimin e kërkesave të tyre.
Por, në përgjigjen e tij, Rama tha se nuk mund t’i miratojë kërkesat pa folur përballë me studentët. Ai tha se nuk mund ta bëjë buxhetin rrush e kumbulla duke mos menduar për të ardhmen.
Më tej, Rama e adresoi fajin për pikën 4 të VKM-së për pagesën e krediteve për provimet e mbartura tek rektorët e dekanët. “Këtë s’ua pata për borxh, nuk keni as burrërinë t’u thoni studentëve se ishte vendimi ynë. A ka përgjegjësi qeveria? Sigurisht. Fajin s’e ka Saliu, fajin e kam unë. Por hajde ta diskutojmë”, tha kryeministri.
Fjala e plotë:
Nuk është Shqipëria për bukë, ta lëmë këtë muhabetin e bukës. Sfida jonë është të kuptojmë e reflektojmë pse u katandisëm në gjendjen ku ishim dhe pse nuk jemi aty ku duam të jemi. Sepse nuk i kemi bërë reformat e sakrificat për vite të tëra, i kemi vjedhur njëri-tjetrit.
Mund ta bëjmë këtë që të them hajde e merri e bëji e nesër të bëhet qameti? S’e bëj kurrë. Mund të bëhet kjo duke i bërë rrush e kumbulla këto që kemi sot? Kurrë.
Jam i vetëdijshëm për gjithçka ndodh, nëse mendoni se kryeministri është ai që duhet t’i bëjë të gjitha, kjo nuk bëhet. Nëse duam ta luftojmë korrupsionin, e bëjmë bashkë dhe kjo nuk është parullë. Studentët të rrinë në protestë sa të duan por nuk marrin dot vendime brenda universitetet, as qeveria s’e bën dot. Hajdeni pushtoni këtë godinë, lëreni Lulin e Monikën, mos u merrni me ata. Hajdeni të ulemi e të merremi me këtë punë. S’është problemi i tarifave.
Pse nuk i ke financuar më shumë universitetet nga buxheti i këtyre viteve?
E thashë qartë, në 2013 shpenzimet mesatare të studentit nga buxheti ishin 70$, sot janë 170. Janë mjaftueshëm? Jo mo nuk është. A është më shumë? Është. Fakti është që ne bëjmë diferencë me rreth afro 50$ më shumë. Ku shkojnë? Janë para të universitetit.
Arsyeja përse unë u ndjeva keq është fakti se VKM-ja e bërë me propozim të të gjithë dekanëve dhe rektorëve ishte befasi për studentët. Është marrë vendimi për të vendosur një tarifë mbi kreditet dhe nuk u është komunikuar studentëve. Ky është një momenti që duhet t’ua them rektorëve nuk ua kishim borxh këtë rektorë dhe dekanë. Ju e dini shumë mirë që nuk ka një nen të Arsimit të Lartë që nuk është konsultuar me të gjithë ju apo një tarifë që nuk e keni vënë vetë. Nëse Nikolla mund të ketë shumë të meta, por ka pasur virtytin që se ka pasur asnjë doktor apo ministër më parë për t’ju dëgjuar për çdo gjë, e për t’ju pyetur e VKM-në e sjell në qeveri të konsultuar me ju, e ju nuk ia thoni studentëve, nuk keni as burrërinë t’u thoni që këtë e vendosëm ne. S’ua kemi pasur për borxh
A ka përgjegjësi ministria? Sigurisht, fajin s’e ka Saliu. E kam unë!/ TIRANA TODAY
