Kryeministri Edi Rama ka zhvilluar një takim me banorë të Himarës, ku i porositi këta të fundit të mos votonin Partinë Demokratike.
Gjithashtu, një pjesë të fjalimit të tij, kreu i PS-së ia dedikoi Vangjel Dules, për të cilin tha se shiti partinë dhe iu bashkua autobusit të Republikës së Re.
Sipas Ramës, Dule nuk meritonte asnjë votë nga minoritarët sepse ka përdorur një retorikë nxitëse dhe nacionaliste vetëm për ndenjësen e tij.
FJALA E RAMËS:
Këtë herë Himara do të jetë e bashkuar, himariotët nuk do të ndahen nën flamuj të lloj-lloj parish. Do bashkohemi dhe kokëfortësisht do të jemi kuq e zi. Nuk e di a ka ardhur Vangjel Dule, por dua t’ju them që Dule e ka thyer rëndom historinë e Himarës, por këtë herë Dulja ka fyer rëndë minoritetin poshtë në zonën e qarkut të Vlorës. Më vjen shumë keq sepse me të kam pasur miqësi, sot jemi më të ftohtë sepse Vangjeli shkoi te Luli dhe kujtoi që unë nuk do të takohesha me Lulin.
Përtej politikës ka diçka që unë dua ta ndaj, që Vangjel Dulja nuk meriton asnjë votë për faktin e thjeshtë se gjithë atë retorikë konflikt nxitëse, nacionaliste, e ka përdorur vetëm për ndenjësen e tij. Braktisi minoritetin, braktisi ata që e kanë mbështet atë parti, braktisi partinë dhe u fut në të njëjtin autobuz me Republikën e Re.
Zoti Vangjel na u dorëhoq kur erdhi Shpëtim Idrizi, nuk mundem të bashkëjetoj me ata fashistë çamë. Shpëtimi ka vendin e vet, kurrë tha nuk bashkëjetoj. Epo mirë, iku. Vajti, e futi partinë në garazh, u fut në autobus me dashin e havasë. Dashi i thotë çamëve votoni Vangjel Dulen pavarësisht se i ka quajtur çamët fashistë. Vangjeli u thotë minoritarëve votoni Dashin.
Shumë 50 veta janë që i shoqërojnë, ata duhet të kuptojnë që ka plot mënyra tjera për ta humbur kohën se sa të shkojnë pas këtij çifti. Apeli im është asnjë votë PD-së që këta e përdorin si çarçafin e martesës. Kjo është e patolerueshme.
Dua t’ia bëj të qartë të gjithë demokratëve: Në nuk kemi asnjë problem me bindjen e tyre. Ama u flas si shqiptari shqiptarëve dhe u them se 25 qershori është mbi bindjet e partive, është momenti historik që së bashku të ngremë flamurin kuq e zi./ Tirana Today
