Kryeministri Rama dhe kreu i LSI-së kanë mbërritur në ambientet e “Hotel Tirana” ku janë duke diskutuar për krizën politike, e veçanërisht për të ardhmen e koalicionit të tyre qeverisës.
Para nisjes së takimit Meta lëshoi edhe një mesazh të rëndësishëm për Ramën, kur tha se çdo marrëveshje nis tek vota e lirë. Ndërsa theksoi se koalicioni i vjetër është ende në fuqi.
“Kjo është marrëveshja e vjetër, që ende është në fuqi dhe që ka një problem të vogël, por që duhet zgjidhur. Kemi angazhim për të garantuar paprekshmërinë e votës së lirë për Shqipërinë evropiane. Tek vota e lirë nis çdo gjë”,- tha ai.
Nga takimi pritet nëse dy krerët e forcave politike do të firmosin vijimin ose jo të koalicionit para dhe pas zgjedhor.
Në këtë takim Rama dhe Meta do të diskutojnë mbi kërkesat e opozitës për qeveri teknike dhe mbi të ardhmen e koalicionit, pasi në 18 prill është edhe afati i fundit për regjistrimin e koalicioneve në Komisionin Qendror të Zgjedhjeve.
Duket se firmosja zyrtare e koalicionit, përveç modaliteteve të brendshme si dhe programit të përbashkët, do ketë pikë të fortë edhe mënyrat e zgjidhjes së krizës aktuale dhe përfshirjes së opozitës në zgjedhje si edhe çështjen e Presidentit të ri të vendit. Seanca e parë është javën e ardhshme dhe megjithëse e majta i ka votat, ka lëshuar sinjale se do të kërkojë një President konsensual me të djathtën.
