Nga Njësia nr. 5 e Bashkisë së Tiranës, kryeministri i Shqipërisë Edi Rama ka ironizuar sërish Partinë Demokratike.
Gjatë prezantimit të kandidatëve për deputet për zgjedhjet e 25 qershorit, Rama është ndalur tek marrëveshja PS-PD.
Sipas tij, qeveria sakrifikoi gjithçka, për interes të shqiptarëve dhe të Shqipërisë hoqi dorë nga interesi vetja.
“Ne sakrifikuam për interesin e Shqipërisë para interesit vetjak. Ne dhamë prova se për interesin Kombëtarë heqim dorë nga pushteti” tha ai.
Edhe sot, njësoj si herët e tjera të kësaj fushate, kryeministri Rama nuk ka nguruar të vijojë me batutat e tij, duke u shprehur se për shkak të vapës, demokratët do t’i kërkonin leje kryebashkiakut të Tiranës që “të qëndronin në çadër me rroba banje”.
“PD-ja e mbylli çadrën nga frika e drejtësisë dhe ndihmuam Lulin të dilte që aty. Demokratët duhet të votojnë PS-në se ne shpëtuam Lulin dhe për të shpëtuar Shqipërinë nga Luli, duhet të votoni PS-në.
Kur shikoni Lulin ne televizor dhe kur e shikoni nga afër është e kundërta. Kur fiken kamerat atë e zë gjumi, nuk është ashtu si duket.
Gjithashtu, dua t’ju them se Luli nuk e ka hallin te ju por e ka te bakllavaja, sheqerparja dhe sherbeti i Fahri Balliut”, vijoi ai.
Rama gjatë këtij takimi tha se në 4 vitet e ardhshme, nëse do të marrë votat e qytetarëve, do të luftojë për të rritur ekonominë dhe punësimin.
