Kryeministri Edi Rama i delegoi një ditë më parë detyrën e ministrit për Europën dhe Punët e Jashtme, zv/ministrit Gent Cakaj, i cili shkaktoi përplasjen Presidencë-Qeveri.
Një ditë pas betimit te Meta, Rama u prit në ambientet e Ministrisë nga Ditmir Bushati, i cili i dorëzoi edhe detyrën. Në fjalën e tij të shkurtër, kryeministri Edi Rama tha se i delegon drejtimin e ministrisë zv/ministrit Gent Cakaj, duke i dorëzuar atij dekretin e Ilir Metës.
“Është fjala më e shkurtër në jetën time. Unë në funksionin tim si ministër i Jashtëm, i delegoj z. Gent Cakaj, drejtimin e kësaj Ministrie dhe përfaqësimin në institucionet ndërkombëtare”, u shpreh Rama.
Më tej, fjalën e mori edhe Cakaj, i cili tha se politika e jashtme e Shqipërisë, nën drejtimin e tij, nuk do ndryshojë. Ai shtoi se Shqipëria do të vijojë punën për hapjen e negociatave, dhe se 5 muajt e ardhshëm do të jenë punë pa orar.
