Ksamili është një prej qendrave më të rëndësishme turistike në jug të vendit me plazhe mahnitëse dhe gjire e shpellave karakteristike.
E gjithë qyteza dhe zonat përreth me atraksione të shumta turistike, vazhdojnë të tërheqin gjithnjë e më shumë vizitorë vendas e të huaj.
Në shërbim të turizmit është ndërtuar edhe bypass-i i Ksamilit, një vepër infrastrukturore që lehtëson lëvizjen në pikun e sezonit turistik për banorët dhe turistët e shumtë.
Kryeministri Edi Rama ka publikuar pamje nga ky investim i rëndësishëm që përveç lehtësimit të lëvizjes, i jep vlerë të shtuar edhe pronës dhe bizneseve në zonës.
Rama shprehet se aksi kryesor i Ksamilit është transformuar në një rrugë të bukur urbane për makinat, po edhe për këmbësorët, për t’i shërbyer më së miri rritjes së përvitshme të turizmit.
Rruga kryesore nga hyrja deri te dalja e Ksamilit është 2.2 kilometër e gjatë ku janë shtuar trotuaret me pllaka, ndriçimi dhe pjesa e gjelbërimit.
Krahas rrugës, në Ksamil ka vijuat puna edhe për ndërtimin e parkimeve publike, të cilat do të lehtësojnë këtë problematikë të theksuar gjatë kulmit të sezonit turistik.
