Koreja e Veriut thotë se ka testuar me sukses një lloj të ri të raketave balistike ndërkontinentale, të cilat mund të arrijnë Shtetet e Bashkuara. Televizioni shtetëror tha se Pyongyang kishte arritur misionin e saj për t’u bërë një shtet bërthamor.
Raketa Hwasong-15, e përshkruar si “më e fuqishmja”, u lançua në orët e para të së mërkurës. Ajo zbriti në ujërat japoneze, por fluturoi më lart se çdo raketë tjetër që Veriu kishte testuar më parë.
Ky test bërthamor sfidoi sanksionet ndërkombëtare të vendosura mbi programin e armëve të Veriut, gjë që solli për rrjedhojë zhvillimin e një seance urgjente të Këshillit të Sigurimit të OKB-së.
Lajmi u dha në televizionin shtetëror, në një transmetim të posaçëm në mesditë, nga agjencia shtetërore e lajmeve KCNA.
Pyongyang thotë se raketa arriti një lartësi prej 4,475 km dhe fluturoi 950 km në 53 minuta, sipas vlerësimeve të bëra nga ushtria e Koresë së Jugut.
Koreja e Veriut ka kërcënuar edhe më parë SHBA-ne, duke deklaruar se predhat e saj mund ta godasin atë, por kjo është hera e parë që pretendohet se kjo mund të ndodhë me një lloj të ri raketash, që duket të jetë një version i përmirësuar i modeleve të mëparshme.
KCNA shtoi se udhëheqësi i Koresë së Veriut, Kim Jong-un, deklaroi se “tashmë keni realizuar me krenari kompletimin e forcës bërthamore të shtetit dhe ndërtimin e një fuqie raketore.
Më tej, në deklaratë thuhet se “ne si një fuqi bërthamore e përgjegjshme bërthamore dhe një shtet paqedashës”, Koreja e Veriut do “të bëjë çdo përpjekje të mundshme për t’i shërbyer qëllimit fisnik të mbrojtjes së paqes dhe stabilitetit në botë”.
Po ashtu, thuhej se armët e saj nënkuptonin mbrojtje kundër politikës së kërcënimeve bërthamore të imperialistëve amerikanë dhe se nuk do të përbënin asnjë kërcënim për asnjë vend, për aq kohë sa nuk shkelte interesat e Koresë së Veriut.
“Kjo është deklarata jonë solemne”, përmbyllet më pas njoftimi.
Një analizë e bërë nga Bashkimi i Shkencëtarëve të Shqetësuar (Union of Cencerned Scientists) del në përfundimin se raketa mund të ketë udhëtuar më shumë se 13 mijë kilometra në një trajektore standardë, duke arritur kështu çdo pjesë të kontinentit të Amerikës.
Por, duket se sipas kësaj analize, raketës mund t’i mungojë fuqia për të kryer një ngarkesë bërthamore, e cila është shumë e rëndë, deri në atë distancë. TIRANA TODAY
