Gjatë takimit me banorë të Progrës në Korçë, si gjithnjë, kryeministri Rama ka shkëmbyer batuta.
Një nga banorët, uroi kryeministrin për fitore, por një lapsus i tij, ka bërë që Rama të reagojë menjëherë.
Në vend të datës 25 qershor, një nga banorët tha: “Partia Socialiste do të fitojë, fitore më 18 qershor”.
Menjëherë ka ndërhyrë kryeministri, i cili i kërkoi atij të ulej pas lapsusit të datës, ndërsa shtoi se dalja nga çadra ishte e domosdoshme për të gjithë demokratët që të votonin në këto zgjedhje.
“Ulu aty se s’të paska ardhur lajmi se nuk është më me 18 qershor, ndryshimi është që më 18 qershor do fitonim vetëm. Mua s’do më vinte keq sikur ata që ishin në çadër të ishin ende, por nuk më zinte gjumi kur mendoja se 25% e shqiptarëve do ishin shumë keq më 18 qershor dhe do ndjeheshin të përjashtuar. Në fund të fundit njeriu i thjeshtë ato ditë ka për të zgjedh shërbëtorët e vet, megjithëse ne kemi dhënë një shembull të keq për të kundërtën kështu që më 25 është gara.
Vettingu u bë. A ju thashë që do ta bëjmë? U bë, do votohet dhe do ta votojnë të gjithë, siç votuam ndryshimet kushtetuese. Por, këto janë mësime dhe këtu nuk është puna se kush e ka fajin, se kush e ka fajin e dinë të gjithë. Nuk na e ka borxhin njeri të tërheqim vëmendjen me luftëra televizive. Njerëzit ulen, nuk bien dakord, por vazhdojnë jetën të qetë. Edhe në një familje s’jemi dakord për të gjitha, po ka të mos jesh dakord me qetësi dhe buzëqeshje dhe ka të shkulësh flokët e njëri-tjetrit. Dhe këtu është qetësia.”/ TIRANA TODAY
