Një anije-cisternë ka shpërthyer sot në Qipro. Anija “Athlos” ndodhej në det të hapur në zonën Zigiu, pak para se të nisej me destinacion portin Aspropirgo të Greqisë.
Si pasojë e shpërthimit, u shkaktua një zjarr i madh ndërsa në bordin e anijes ndodhej ekuipazhi i përbërë prej 34 personash.
Mësohet se 2 anëtarë të ekuipazhit janë plagosur rëndë, teksa kanë pësuar djegie në trup, ndërsa 3 të tjerë janë lënduar më lehtë. Të plagosurit u dërguan në spitalin e Larnaka.
Mediat greke raportojnë se kapiteni i anijes nuk ka pranuar të braktisë timonin, pavarësisht thirrjeve të autoriteteve dhe rojës bregdetare të Qipros.
