Në fund të mandatit të saj katër vjeçar, Qeveria vijon të japë konçesione. Ministria e Energjisë dhe Industrisë po vijon procedurat për dhënien e koncesioneve të hidrocentraleve. Në një njoftim të saj, hidrocentrali i parë është ai i Lusës, që pritet të ndërtohet mbi përroin që mban të njëjtin emër dhe që është degë në pjesën e sipërme të lumit Mat.
“Pellgu ujëmbledhës i Lusës ndodhet në krahun e djathtë të rrjedhjes së lumit Mat dhe pjesa e shfrytëzimit përfshin nga pika e burimit deri në kuotën 500 metra mbi nivelin e detit”, informon MEI.
Listës së hidrocentraleve i shtohet edhe ai i Thanës. Ky hidrocentral është i tipit pranë digës dhe përdor për prodhimin e energjisë elektrike ujërat e rezervuarit të Thanës.
Ky rezervuar, për t’u mbushur dhe ushqyer me ujë, shfrytëzon ujërat e lumit Devoll”, thuhet në dokumentin e ministrisë.
Të dy këto hidrocentrale do të jenë të formës partneritet publik- privat me të drejtë shfrytëzimi për 35 vjet dhe pjesën më të madhe të vlerësimit me pikë e merr fuqia e instaluar që do të propozohet. Ofertat duhet të paraqiten brenda datës 17 korrik.
