Qerimaj i gjashti, zhgënjen Krenar Shoraj

Erkand Qerimaj e mbylli në vendin e gjashtë në dygarësh garimin e tij në botërorin e peshëngritjes që po zhvillohet në Shtetet e Bashkuara të Amerikës. Peshëngritësi shkodran realizoi vetëm 2 nga 6 provat në të dy stilet, duke zënë përkatësisht vendin e 4 në shkëputje dhe vendin e 9 në shtytje, ne peshën deri në 77 kg. Garimi i Qerimajt në stilin e shkëputjes nisi me peshën 155 kg, provë të cilën e realizoi me sukses. Në dy provat e tjera Qerimaj dështoi të ngrinte 157 kg. Në këtë stil Qerimaj i rendit në vendin e katërt.Jo më i letë ishte garimi në shtytje, ku pas provës së parë me 187 kg, Qerimaj nuk arriti të realizonte asnjë prej dy provave të tjera me 191 kg, duke e mbyllur garën në këtë stil në vendin e 9-të. Në total peshëngritësi shkodran arriti të ngrinte 342 kg, duke zënë edhe vendin e gjashtë. Medaljen e artë në këtë garë mori egjiptiani Mouhamed, Rejepov nga Turkmenistani mori medalje argjendi dhe Maurus i SHBA mori medalje bronzi.Me shtangistin Krenar Shoraj, që garoi në Baterinë B të peshës 85kg, është mbyllur sot aventura e kuqezinjve në Botërorin e peshëngritjes, që po zhvillohet në Anaheim të Amerikës. Shoraj realizoi vetëm një provë nga 6 që kishte në dispozicion, duke mos dhënë rezultat në dygarësh. Peshëngritësi realizoi me sukses vetëm provën e parë në shkëputje, ku ngriti 145kg, ndërsa në dy përpjekjet e tjera për të ngritur fillimisht 150kg e më pas 152kg, dështoi. Në këtë stil, Shoraj u rendit në vendin e 6-të të Baterisë B, por ajo që bie në sy është se peshëngritësi kuqezi nuk është ngjitur fare në pedanë në stilin e shtytjes. Për pasojë, ai nuk jep rezultat në dygarësh, duke mos hyrë në renditjen përfundimtare të peshës 85kg.