Vladimir Puti do të vizitojë Serbinë më 17 janar të vitit të ardhshëm. Lajmi është bërë i ditur nga presidenti i Serbisë, Aleksandar Vuçiç. Por, cila është arsyeja e kësaj vizite?
Sipas mediave serbe, fuqitë më të mëdha SHBA dhe Rusia po luftojnë për dominim në rajon me afrimin e zgjidhjes së problemit të Kosovës.
Duket se presidenti rus nuk dëshiron të humbë kohë pas letrës së Trump ku u bënte thirrje Thaçit dhe Vuçiçit për të arritur marrëveshje historike.
“Pasi marrëveshja në Paris më 11 nëntor nuk është arritur përkundër pritjeve, Trump ka parë si shans që të marrë një rol kyç dhe mentorimin e negociatave”, citon burimet e veta nga qarqet diplomatike, media serbe “Blic.rs”.
Prandaj, në një letër drejtuar Thaçit ai tha se ai është i gatshëm për të pritur atë dhe Vuçiçin në Shtëpinë e Bardhë, për të festuar për zgjidhjen e problemit.
Në fund të letrës bie në sy fakti se Trump ka shkruar se pret që në Shtëpinë e Bardhë të mirëpresë presidentin Thaçi dhe homologun e tij serb, Aleksandar Vuçiç, për “të festuar atë që do jetë një marrëveshje historike”.
Dhe këtë “ngutje” të Putinit, media serbe e quan “panik”, për të cilën gjë shkruan se edhe ka vendosur që së shpejti të vizitojë Serbinë.
Rusia njihet si mbështetëse e aspiratave të Serbisë. Këtë së fundmi e dëshmoi edhe ambasadori rus në OKB Vasily Nebenzja i cili mbështeti presidentin serb Vuçiç dhe Serbinë në seancën e Këshillit të Sigurimit të OKB-së të mbajtur me propozimin e Serbisë, për shkak të formimit të ushtrisë së Kosovës, raporton BË.
Ai tha se ndau shqetësimin e shprehur nga presidenti serb dhe theksoi se transformimi i FSK-së në Ushtri të Kosovës është shkelje e Rezolutës 1244 dhe se kërcënon paqen dhe sigurinë në rajon. Ai gjithashtu vlerësoi se KFOR-i ishte selektiv në përmbushjen e mandatit të tij.
