Presidenti i Rusisë, Vadimir Putin është për një vizitë zyrtare në Teheran. Putin do të bisedojë për krizën në Siri dhe bashkëpunimin në fushën e energjisë, me presidentin e Iranit, Hassan Rohani. Poresidenti rus do të marr takim edhe me liderin suprem, Ajatollah Ali Khamenei, gjatë ditës së sotme.
Zëdhënësi i Kremlinit, Dmitri Peskov, u tha mbrëmë reporterëve se “çështjet e ndërlidhura me Sirinë do të jenë në agjendë të bisedimeve dypalëshe ruso-iraniane”. Ai nuk ka shpjeguar më tepër.
Rusia dhe Irani e mbështesin qeverinë e presidentit të Sirisë, Bashar al-Assad, në luftën e cila po zgjatë më tepër se gjashtë vjet, ndërsa Shtetet e Bashkuara dhe Turqia i mbështesin grupet e ndryshme kryengritëse.
Zëdhënësi Peskov tha se presidenti Putin, gjatë vizitës punuese në Teheran, do të ketë edhe bisedë tripalëshe me presidentin Rohani dhe presidentin e Azerbajxhanit, Ilham Aliyev.
Ky është takimi i tyre i dytë në këtë format. Takimi i parë ishte inicuar vitin e kaluar nga presidenti Aliyev.
