Për shkak të startimit të fazës së katërt të punimeve që kanë nisur para dy javëve, mësohet se sot do të bllokohet sërish autostrada Tiranë-Durrës. Në njoftimin për media, bëhet me dije se devijimi i trafikut do të nisë në orën 6 të mëngjesit, e deri në 10 të mbrëmjes.
“Devijimi i trafikut do të fillojë në orën 06:00, deri në 22:00 të ditës së hënë, datë 25/06/2018. Trafiku në drejtim Tiranë-Durrës do të devijohet në mbikalimin e Shkozetit, në drejtim të rrugës së unazës së Shkozetit dhe të ndjekin Shkozet-Durrës ( zona Kënetës) ose unazën e Shkozetit”.
Pas përfundimit të ndërhyrjes në segmentin Shkozet – Durrës, do të fillojë ndërhyrja në drejtimin Durrës – Tiranë. Punimet në autostradë kanë nisur para dy javësh, ndërsa punohet vetëm gjatë ditëve të javës, pasi në fundjavë është hapur për shkak të fluksit të lëvizjes së qytetarëve në drejtim të Durrësit, për shkak të sezonit turistik.
