Ish-drejtori i Arkivit në Ministrinë e Brendshme, Kastriot Dervishi ka publikuar dy foto të rralla të ish-diktatorit Enver Hoxha. Sipas Dervishit, në një nga fotot e publikuara, ish-diktatori shihet në prehër të Spiro Kserës.
Më poshtë fotot e publikuara nga Dervishi me komentet përkatëse:
Komandanti legjendar, nga prehri në prehër
Në vijim të fotos të djeshme të bërë gjatë “epopesë së lavdishme të luftës nacionalçlirimtare që zhduku apo nxori jashtë luftimit 70 mijë ushtarë armiq dhe tradhtarë të vendit”, një tjetër foto e komandantit legjendar, por me prehër tjetër, atë të Spiro Kolekës. Edhe kjo foto është një kornizë e mirë që tregon një ditë të këndshme maleve me blerim mbuluar të disa burrave të zbukuruar me ndonjë kobure brezi apo armë të gjata që mezi i mbajnë në dorë. E quaj me vend të përmend edhe fotografin, se i takon e drejta e autorit. Ai është shoku Miladin Popoviç, mentori dhe drejtuesi i Partisë Komuniste të Shqipërisë në vitet 1941-1944.
Çfarë tregon kjo foto e vitit 1943?
Kjo foto është bërë në Labinot të Elbasanit gjatë kohës që shtabi i përgjithshëm i ushtrisë komuniste, i ndjekur këmba-këmbës nga armiqtë e jashtëm e “tradhtarët e vendit” ishte strehuar atje, në pritje të fundit të luftës së përbotshme.
Sikur t’ia jepnim këtë foto për këqyrje ndonjë të huaji, me siguri që do ta përshkruante me nota entuziaste, mbase edhe paska erotike këtë piknik. Ai me siguri nuk do ta dinte se në foto është komisar Enveri dhe ndonjë anëtar i shtabit, natyrisht të ushqyer mirë me kecat bio të Labinotit e të mbathur po kaq mirë me këpucë angleze dhe gjëra të tjera që i hidhnin pafund aleatët gjatë luftës.
Kastriot Dervishi
