Psikologja e njohur Lira Gjika shkruan se përdorimi i fjalës “turp” tek fëmijët është një ç’edukim.
Me anë të një statusi në rrjetin social “Facebook”, psikologia Gjika shkruan se të gjithë duhet ta heqim nga fjalori këtë fjale që ç’edukon.
Fjala që ç’edukon
Fjala “turp” është present në fjalorin tonë të përditshëm, sidomos për edukimin e fëmijëve. Kjo fjalë i ndjek fëmijët ngado që shkojnë; në shtëpi, në rrugë, në autobus dhe për fat të keq edhe në shkollë. Madje aty është më e “fuqishme” se kudo.
Prindër, gjyshër, mësues, të paduruar dhe gjithë nerva, që nuk arrijnë të qetësojnë veten e tyre dhe u vërsulen fëmijëve me fjalën “turp”.
Mesa duket të rriturit, këtë fjalë nuk kanë nevojë ta kujtojnë, sepse është e rrënjosur thellë në memorje dhe kështu del vetvetiu, pa patur nevojë për tu menduar.
Të rritur të gjithë pa përjashtim, prindër, gjyshër, mësues, kalimtarë në rrugë, hiqeni këtë fjalë nga fjalori, nëse vërtetë doni që fëmijët të jenë e të bëhen më të edukuar se ne.
E kemi provuar tashmë që etiketimet, fyerjet dhe dhuna nuk na kanë bërë më të mirë e të edukuar. Kështu që, ka ardhur koha të shmangim nga përdorimi fjalën e parë që na vjen në mend, kur u drejtohemi fëmijëve për tu tërhequr vëmmendjen.
Të gjithë jemi dëshmitarë që kur nervozohemi, fjalët e para, janë sharje, etiketime e mallkime dhe në krye të tyre, fjala “turp”. Përpiquni të rritur pa përjashtim, ta hiqni nga përdorimi këtë fjalë që vetëm ç’edukon.
