Ditën e sotme nis provimi i shtetit për profesionin e rregulluar të mësuesit, ku të parët që do i nënshtrohen, janë mësuesit në arsimin fillor për të vijuar më pas testimet sipas kalendarit të publikuar nga Agjencia Kombëtare e Provimeve.
Mësohet se provimi i shtetit do të zhvillohet në godinën e Qendrës së Shërbimeve Arsimore (më poshtë QSHA) me adresë: Rruga: “Naim Frashëri”, Nr. 37, Tiranë.
Kandidatët duhet të paraqiten në QSHA 30 minuta para fillimit të provimit të shtetit, ndërsa me vete duhet të kenë këto dokumente:
-Letërnjoftim (Kartë ID ose Pasaportë) për pjesëmarrje në provimin e shtetit (dokumenti origjinal);
-Kopje të Kartë ID ose Pasaportë;
-Në rast ndryshimi të mbiemrit, kandidati të paraqesë certifikatën përkatëse që vërteton këtë ndryshim;
-Faturën e pagesës së tarifës së provimit të shtetit për llogari të QSHA, nga një bankë e nivelit të dytë/postë (sipas faturës për arkëtim të publikuar në faqen zyrtare të QSHA) sipas herës së pjesëmarrjes; {Vëmendje: fatura të ketë vulën e bankës përkatëse};
-Kopje të diplomave të programeve të ciklit të parë dhe të dytë të studimeve të përfunduara prej tyre, si dhe njohjen e tyre nga MAS, në rast përfundimi të programeve të studimit jashtë shtetit. {Kandidatët, të cilët nuk janë pajisur me Diplomë të ciklit të dytë të studimeve, duhet të paraqesin një vërtetim nga Universiteti përkatës, ku konfirmohet shlyerja e të gjitha detyrimeve, përfshirë edhe gjuhën e huaj, sipas akteve ligjore dhe nënligjore në fuqi).
Agjencia Kombëtare e Provimeve ka publikuar listën me emrat e mësuesve që do t’i nënshtrohen provimeve të shtetit gjatë muajve korrik dhe gusht.
