Adriatik Llalla vazhdon të habisë me guximin e tij për të vendosur pasurinë sipas një skeme që ekspertët e fushës e cilësojnë tipike për pastrimin e parave të pista. Duke blerë lirë dhe duke rishitur ose duke e rivlerësuar pas shumë pak kohësh me një çmim shumë herë më të lartë se në fillim. E duke mbuluar në këtë mënyrë paratë e fituara me anë të korrupsionit në shpërdorim të detyrës, siç SHBA e kanë akuzuar kur ka qenë Prokuror i Përgjithshëm i Republikës.
Alpenews.al që ka gjithë dosjen e dokumentave të transaksioneve të dyshimta të Llallës, me anë të të cilave po punohet edhe për ngritjen e akuzave penale ndaj tij, po boton sot dokumentat dhe provat e një transaksioni tipik që përdoret për pastrimin e parave të pista.
Siç mund ta lexoni më poshtë kemi të bëjmë me një operacion të Llallës për blerjen fillimisht me letra të një shtëpie në plazhin e Durrësit me një çmim prej 2 milionë e 200 mijë lekësh. E për ta shitur vetëm pas dy javësh me një çmim disa herë më të lartë. Në përfundim të kësaj manovre me letra, Llalla rezulton se ka futur në xhep plot 50 mijë dollarë.
Kaq mjafton për të kuptuar se prapa çdo transaksioni të tillë, të cilat Llalla i ka me shumicë përgjatë viteve të fundit kur ishte Kryeprokuror i Republikës, fshihet një akt korruptiv siç thoshte SHBA, apo një mbyllje dosje për krimin, siç dëshmonte kundër tij një ish ministër drejtësie.
Më poshtë keni provat e këtij skandali dhe gjithkush mund të shikojë e gjykojë sesi është abuzuar me detyrat e larta shtetërore në Shqipëri, me qëllim pasurimi në mënyrë të paligjshme. Këta shembuj vërtetojnë jo vetëm akuzat e SHBA ndaj Llallës, por krijojnë bindjen e plotë se nga dhe si rridhte pasuria e familjes së ish Kryeprokurorit e zhytur në luks të shfrenuar, me një standard jetese prej sheikësh dhe jo prej një zyrtari me rrogë shteti./Alpenews.al
