Drejtori i Policisë së Shtetit, Ardi Veliu, ka rrëfyer detajet e vetëdorëzimit të Balilit, sikundër edhe kushtet që i kishte vendosur autoriteteve.
Sipas Veliut, si kusht i parë i Balilit ishte që mos të keqtrajtohej nga punonjësit e policisë, si dhe fakti që të deklarohej vetëdorëzimi.
“Balili kishte dy kushte për vetëdorëzimin. Së pari që mos të keqtrajtohej, dhe që të deklarohej vetëdorëzimi. Jam kontaktuar nga familjarët pas 3 muajsh negociata. Shkova personalisht me një makinë shoqëruese”, tha Veliu.
Balili u vetëdorëzua sot në orën 8:45 mes Delvinës dhe Finiqit, ndërsa gjithçka u bë në prani të drejtorit të Policisë së Shtetit, Ardi Veliu. Balili ka qenë i shoqëruar nga nipi i tij Rigers Balili, ndërsa ai është shoqëruar drejt Tiranës nga Veliu.
Prej muajit maj të 2016, Klemend Balili është shpallur në kërkim me vendim të Gjykatës së Athinës, që ka caktuar masën e sigurisë “arrest me burg”. Balili arriti t’i shpëtonte prangave, ndërsa ka dyshime të forta se operacionet janë dekonspiruar nga njerëz që bashkëpunonin me trafikantin e kërkuar edhe nga DEA amerikane.
