Në të gjitha mediat u publikua lajmi se Gjykata e Apelit ndryshoi masën e sigurisë për Ervis Martinajn, nga “burg me afat 30 ditë” në “burg pa afat”. Kujtojmë së Martinaj u arrestuar pas një përplasje me armë me një të vrarë në ish-bllok.
Pas vendimit të gjykatës ndaj Martinajt, Prokuroria nuk bëri asgjë publike se cila ishte prova që la pas hekurave Martinajn, sepse ai për pak po i shpëtonte drejtësisë.
Burime për Tirana Today deklaruan se prova që fundosi Martinajn janë mesazhet që ai i ka dërguar grupit të tij. Mesazhet janë gjetur në telefonin “iPhone” të Martinajt.
I njëjti burim konfirmon se janë ekspertët izraelitë ata që kanë zhbllokuar telefonin dhe aty janë gjetur mijëra mesazhe.
Prokuroria ka zbardhur të gjitha mesazhet, por më i rëndësishmi është një mesazh që është dërguar pak kohë para se të ndodhte ngjarja në ish-bllok.
Martinaj u dërgon mesazh shokëve të tij që duhet të vijnë në lokal me armë. Kjo është provë vendimtare që e implikon Martinajn mbi akuzën “vrasje e mbetur në tentativë”, dhe fakton akuzat e Prokurorisë.
Me këtë provë kyçe Martinaj e ka të pamundur që të shpëtojë drejtësisë shqiptare ashtu si kishte bërë më parë.
Kujtojmë se Martinaj i cili po ashtu mbeti i plagosur në përleshjen e cila ndodhi në fillim të tetorit. Veç akuzës kryesore Prokuroria po e heton edhe për “zhvillim bastesh të paligjshme”, “pastrim parash” e akuza të tjera.
Fillimisht gjykatësi Artan Gjermeni në Shkallën e Parë vendosi masë sigurie me afat 30 ditë, duke kërkuar më shumë prova nga prokuroria. Në Apel Hysni Demiraj ka pranuar pretendimin e prokurorit Gent Xholi që përfaqësoi akuzën, dhe ka hequr kufizimet kohore mbi masën e sigurisë.
Bashkë me Martinajn me masë sigurie arresti me burg është edhe Eljon Hato, i cili po ashtu u plagos gjatë përleshjes, në të cilën mbeti i vrarë Fabjol Gaxha. Mbrojtësit kërkuan lirimin e tyre duke pretenduar se ata nuk kishin qenë pjesë e përplasjes me armë.
Po ashtu i arrestuar për përplasjen me armë është dhe Geldo Hoti, ndërsa në kërkim janë Ervin Mata, Fabio Allushi, Meviol Bilo dhe Ajaks Boshnjaku. Këta të fundit janë nën akuzë për vrasjen e Gaxhës.
Nga personat e identifikuar si të përfshirë në përplasje Martinaj është me precedentë penalë. Ai është akuzua për një vrasje në vitin 2015, por u dënua për një akuzë të lehtë me vetëm 1 vit e katër muaj. Martinaj po ashtu u përmend edhe gjatë dëshmive në gjyqin ndaj Emiljano Shullazit, ndërsa rezulton se ka një dënim me tre muaj burg për “organizim lojrash të paligjshme të fatit”. TIRANA TODAY
