Kuvendi do të zhvillojë dy seanca plenare. Një sot, ku do të diskutohet dekreti i presidentit Meta për kthimin e buxhetit, ndërsa nesër do të diskutohet Vettingu në politikë.
Por ajo që bie në sy në këto dy seanca është prania e opozitës, e cila prej 6 muajsh ka bojkotuar punimet e Kuvendit, duke mbajtur një qëndrim të kushtëzuar.
Sipas opozitës, prania e saj në Kuvend është për dy arsye. E para, për të mbështetur studentët në kauzën e tyre, dhe e dyta për Vettingun në politikë, një propozim i vetë Partisë Demokratike.
Sakaq, Sekretari i Përgjithshëm i PD-së Arben Ristani, ka zbuluar se PD dhe opozita do të kthehet në Kuvend vetëm për pjesën kur do të diskutohet buxheti.
I ftuar në emisionin ‘Natë me Xhaxhiun’, Ristani deklaroi se sapo të diskutohet buxheti, i cili u jep zgjidhje dhe një pjesë të kërkesave të studentëve, opozita do të largohet.
‘Opozita do jetë në Kuvend vetëm për pikën kur do diskutohet buxheti, që u jep zgjidhje dhe një pjesë të kërkesave të studentëve, dhe do largohemi. Ka dhe kërkesa të tjera që do të diskutohen’, u shpreh më tej ai.
