Protesta e minatorëve një ditë më parë shkaktoi shumë zhurmë, jo vetëm mediatike. Minatorët protestuan përpara Kryeministrisë, për të kërkuar miratimin e statusit të tyre; një draft që është hartuar nga Ministria e Industrisë dhe Energjisë bashkë me grupet e interesit në 2017, por i pamiratuar ende nga qeveria, me argumentin e efekteve të mëdha financiare në buxhet.
Të rebeluar e me megafon në dorë, ata thërrisin me sa zë kishin, për të kërkuar të drejtën e tyre. Ajo çfarë tërhoqi syrin e çdo kalimtari, i cili ishte jashtë kësaj proteste, kishte të bënte me një kryefamiljar, i cili mbante një qese me kanaçe.
Dy palë, me dy misione të ndryshme, por që në fund i bashkonte siguria financiare. Në propozimet e minatorëve kërkohet rritja e masës së pensionit në 30 mijë lekë në muaj, nga 16 mijë lekë që është ai aktual.
E ndërsa nga ana tjetër, është dhe një pjesë e shoqërisë e cila del rrugëve, me shpresën për të siguruar bukën e gojës.
Papunësia dhe varfëria mbetet një anë e medaljes, kundrejt fasadave plot ngjyra e dritave të cilat na përhumbin në pak çaste në trishtimin që na mbyt. Mjerimi kapërcen çdo limit të imagjinatës.
Shumë emisione i dedikohen rasteve të familjeve, të cilat luten për pak bukë, e ndërsa sytë i kanë kthyer drejt qiellit, duke u lutur se një ditë më e mirë do të vijë. /M.S
Tirana Today
